SHILLONG: Trinamool Congress (TMC)-ni dilgipa Mamata Banerjee, Bharatiya Janata Party (BJP)-ni kosako chakatgipa manchade ong·ja ine All India Congress Committee (AICC)-ni general secretary Jairam Ramesh parakataha.
“TMC dol maming saloba BJP-ni kosako chakatgipa ong·ja. Ua (Banerjee) MDA-ni bakan ong·achim aro ua NDA-oni ong·katasan ong·aia. Ua BJP-ni kosako chakatgipa mande ong·bebegenchimode maini gimin ua vice president-ni opposition candidate-na chakpaaniko on·jaha?” ine Sonibar salo Ramesh, kobor ra·timgipa manderang baksa agangrikengmiting somoio TMC-ni dilgipako sing·doataha.
Vice president-ni kamna Dhankar-ko candidate dake NDA-ni parakataoni salgittam ja·man, West Bengal-ni chief minister Mamata Banerjee, Jagdeep Dhankhar aro Assam-ni CM Himanta Biswa Sarma-ko Darjeeling-ni Raj Bhavan-o grongaha ineba AICC-ni general secretary parakataha.
“Uni ja·mande ua (Banerjee) vice president-ko seokanio bak ra·jawa ine parakataiaha,” ine Ramesh aganaha.
Mamata aro uni grigipa Abhishek Banerjee sakgnian bilgrigiparangsa ong·a ineba Ramesh parakataha.
“Pringode ua (Mamata) BJP-ni kosako chakatgipa ine agangen indiba attamode uni BJP-ni gimin chanchiani dingtangaignok,” ine AICC-ni general secretary aganaha.
Indake ong·engon, RSS-ni miksonganian a·songni niam bidikko dingtangani ong·enga ineba Ramesh parakataha.
“Dr BR Ambedkar sagiko RSS jegalaha aro Jansangh-ko bikotgipa Syma Prasad Mukherjee, a·songni niam bidikko jegalaha. Uamang an·chingni niam bidik aro political system-ko namnikjaenga. India a·songara dingtang dingtang jat aro toromrangni apsan nangrime songdong a·chagipa a·song ong·ani gimin uamang dongsiksakenga. Uamang president-ni bimangosa sorkariko nangnikenga,” ine AICC-ni dilgipa parakataha.
Ramesh-ni parakatani gitade, uamang Article 370-ko ra·galna man·ahaode Article 317 aro Sixth Schedule-ko ra·galna man·aignok.