TURA: Meghalaya a·dokni Chief Minister aro National People’s Party (NPP)-ni national president Conrad K Sangma-ni South Tura constituency-o Trinamool Congress (TMC)-ni candidate Richard M Marak-na da·al Budbar salo, TMC-ni national general secretary Abhishek Banerjee campaign ka·anggen.
Skanggipa ua, TMC-ni manderang baksa Hawakhana petrol pump-oni Tura Bazar-ona ja·achi re·jomanggen aro Tura Bazar-o donggipa Council building-o jinma tom·bimonganiko ong·atanggen.
Koborko on·ani gitade, TMC-ni national general secretary baksana TMC-ni chairperson Mamata Banerjee aro gipin dilgiparang, jekai Mahua Moitra, Derek O’Brien, Saket Gokhale aro gipin dilgiparangba a·dokni dingtang dingtang biaprangona re·bae TMC-ni candidate-rangna campaign ka·angna gita sienga.
Indake ong·engon, South Tura constituency-o a·dokni chief minister aro NPP-ni candidate Conrad Sangma baksa susaenggipa TMC-ni candidate Richard Marak, batanggimin bilsi bongani gisepo sorkariko name chalaijahani gimin aro sorkarini kamrangni bidingo manderangko dilsretaha ine NPP-chi dilgipa sorkariko matnangataha.
Jal Jeevan Mission (JJM)-ni kamna Conrad-ni ‘gaora’ dake aganenggipani gimin jegalatengon, “2018 bilsio nokdang ge 4000-oni ge lak 2.5 nokdangrangna JJM-chi chi pipe-rangko sale on·na man·aha ine maikai chief minister, rasong dakna man·enga? Garo Hills-mangmangon bang·bea songrango JJM-ni kamrang chu·sokgijaniko nikna man·enga. Rongjeng jolo donggipa Imamsdrop songko niatbo, ia songo manderang chirangko man·jaengasan ong·ja indiba ia songo JJM-ni kamko re·anggipa bilsion matchotjok ine songni manderangko togiaha ine songni Nokma an·tangan matnangpilaha. South Tura constituency-oba bang·a nokdangrangan ringani chirangko man·tokjaenga. Indide maio pangchake ua gaora dakenga?” ine Marak sing·doataha.
A·doko tom·tomaniko ra·bana man·aha ine CM-ni agananiko jegalatskaengon, “A·doko tom·tomaniko aro niam retiko rakkina man·enga ine CM tol·e a·kangaha. Adita salrangna skang, Phulbari-o chadamberang aro skigiparangni tom·tome re·jomengmiting somoio NPP-ni MDC baksa gipin manderangni kragija dake chadrapanian uni tol·aniko mesokani ong·enga,” ine TMC candidate parakataha.
Songsalo manderangni janggi tanganikoba NPP sorkari maming daken tang·doatna man·jaha ineba ua aganaha.