TURA: Dadenggre Sub-Division-ni 4th teacher-rang, 2021 bilsini September jani aro 2022 bilsini December jani dormaharangko man·tokkujaenga ine Dadenggre 4th Teachers Association-ni president Soresh Ch Marak, suk ong·gijaniko parakataha.
Marak-ni parakatani gitade, Meghalaya a·dok gimikon gipin a·jarango kam ka·enggipa 4th teacher-rangde 2022 bilsini December jaona kingkingan chu·gimik dormaharangko man·tokahachim indiba Dadenggre Sub-Division-ni 4th teacher-rangde an·tangtangni chu·gimik dormaharangko man·tokkujaengani a·sel neng·nikanirangko chagrongna nangtokengachim.
“Chinga SDSEO office-ona re·ange chingni dormaharangko on·china changni chang mol·molahachim indiba da·onan chingna chingni man·na nangkuenggipa dormaharangko on·kujaenga. Ia jani gisepon chingni man·na nangkuenggipa dormaharangko SDSEO on·jagenchimode chinga mikkang jao DSEL-ona re·ange badi ka·anggnok,” ine Dadenggre 4th Teachers Association-ni president parakataha.
Marak-ni parakatani gitade, Dadenggre Sub-Division-ni ning·o sak 91 4th teacher-rang donga aro uamang an·tangtangni man·na nangkuenggipa dormaharangko man·jae neng·nikanirangko chagrongna nangtokengahachim.