TURA: National People’s Party (NPP)-chi dilgipa MDA sorkari, a·dokni manderangko cha·bokanian gapaha aro uandaken Chief Minister Conrad K Sangma-ni South Tura constituency-oba maming namroro silroroaniko nikna man·jaha ine Robibar salo Trinamool Congress (TMC) matnangatenba, TMC dolmangmangsan manderangni nangnikenggipa dingtanganiko ra·bana man·aigen ine parakataha.
“TMC dolmangmangsan BJP-ko warachakna man·gipa dol ong·a ine chinga nikna man·aha. Meghalaya a·doko songdongenggipa dingtang dingtang jatrangni nanganirangna, Khasi aro Garo ku·sikrangko Constituency-ni Eighth Schedule-o chapatani aro uandakgipa dingtang dingtang nanganirangna chingni dilgiparang dontonggija ku·rang on·aha. Ia sal somoirango manderang namen seng·aha aro da·o February 27 tariknasa senge dongtokenga,” ine South Tura constituency-ni TMC candidate Richard Marak, kobor ra·timgiparangna parakataha.
Ia election-o ua manderangni chakpaanirangko man·gen ineba Marak, an·tangni ka·dongchakenganiko parakataha.
Robibar salo, TMC-ni press conference-ko ong·atanio TMC West Garo Hills-ni district coordinator Sapford N Sangma, TMC South Tura block president Ajay Marak, general secretary Chenny Tasha D Marak aro joint secretary Stephen Sangma-ba dongpaahachim.
Tura-o skul nokrangni obostarang namsrangjaha aro lekka poraniko on·ani kamrang namsrangjaenga ine matnangatengon, “2018 bilsini manifesto-o NPP, lekka porakon mongsonggipa daito ong·e ra·na ku·rachakenba manderangko pu·onchina didiahachim indiba Chief Minister-ni South Tura constituency-o an·ching skulrangni obostarangko nikna man·enga. Ia constituency-o bang·bata skul nokrangan namsrangjaha aro Dobasipara-ode bi·sarang, community centre-rangosa poraina gita nangtokenga,” ine South Tura constituency-ni TMC candidate parakataha.
South Tura, North Tura aro Raksamgre constituency-rango maming namroro silroroani kamrangko nikna man·jahani gimin aganchakaniko on·china NPP-o dabiangengon, jillarango manderang re·rurana gita maini gimin city bus-rang dongkujaenga ine TMC-ni dilgiparang sing·doangaha.
Batanggimin bilsi bongani gisepo bang·en tangka paisarangko jakkalsretaha ine matnangatengon, NPP-chi dilgipa sorkarini ka·sretgipa kamrangko salsanode parakna man·jawa aro mingantiko parakna gitade baditaba jarangko nangpilgen ine Marak parakataha.
“Department ge·antion, kam ka·sretani aro tangka paisa jakkalsretanirangko matnanganirang dongaha aro chinga manderangni namgnina chanchie ia kamrangni gimin ku·rangko on·aha. Chingni manifesto-o ming 10 ku·mikchetanirangko chinga donaha aro ia ku·mikchetanirangko chinga manderangni namgnina chu·sokatgen,” ine Marak ku·rachakaniko on·angaha.