SHILLONG: A·songni Prime Minister Narendra Modi-ni tom·bimonganiko ong·atna gita Tura-ni PA Sangma Stadium-ko on·jahani gimin a·dokni Sports department-ko BJP-ni matnangatani ja·man iano ua an·tangde maming jak dongja ine a·dokni Chief Minister aro National People’s Party (NPP)-ni national president Conrad Sangma talataniko on·angaha.
An·tangni kosako matnanganirangko jegalatengon, maini gimin Prime Minister Narendra Modi-ni tom·aniko ong·atna gita district administration, PA Sangma Stadium-ko on·jaha ua mamingkoba ma·sija indiba ua an·tangba tom·anirangko ong·atna gita adita biaprangko man·jaha ine Sangma parakataha.
“Election-na tom·anirangko ong·atchakna gita biaprangko on·anide Election Commission aro District Administration-ni bilosa ong·a aro uamangsa obostarangko nienba PM Modi-ni tom·aniko PA Sangma Stadium-ko on·janaba tik ka·enggen,” ine Chief Minister aganaha.
PA Sangma Stadium-ko matchotgijan nokdonggae on·aha ine matnangenggipani bidingo aganchakaniko on·angskaengon, ia stadium-o football stadium aro indoor stadium dake bakgni donga ine Sangma parakataha.
Football stadium-kode matchotahani gimin sorkari, ia bakko nokdonggae on·aha indiba indoor stadium-kode matchotkujaengani gimin da·o dipet ia bakrangkode nokdonggae on·a dongkuja ine ua talataniko on·angaha.
“Maini gimin district administration PA Sangma Stadium-o tom·chakna gita on·jaha uade angni bilo ong·jani gimin angade iani bidingo mamingkoba aganna man·jawa. Bang·a biaprangon tom·anirangko ong·atna gita angnaba permission-ko on·jaha aro ia pilakan Election Commission aro District Administration-ni ning·osa ong·a,” ine Sangma aganaha.
Meghalaya a·doko PM Modi aro BJP bilakbaengani giminsa Tura-o PM Modi-ni tom·aniko mitam dolrang champengna jotton ka·enga ine BJP matnangatahachim.
