TURA: North aro West Garo Hills a·jani ning·o donggipa B-Mahal-ni a·arangko Meghalaya Industrial Development Corporation (MIDC) aro Meghalaya Tourism Development Corporation (MTDC)-na NPP sorkari aro GHADC-ni pale cha·aniko jegalna gita February-ni 23 tariko jinma tom·bimonganiko Hatogaon songni kal·chakramo ong·atenga ine Save B-Mahal Committee-ni chairman Rimjen Ch Sangma u·iatenba, ia tom·bimonganio re·bae bakko ra·echina gita B-Mahal-ni ning·o donggipa dingtang dingtang songni Nokmarangko aro songni manderangko didiataha.
Sangma-ni parakatani gitade, B-Mahal-ni ning·o donggipa biaprangara Sixth Schedule ning·o ga·akgipa biaprangsa ong·achim indiba ia biaprangko NPP-chi dilgipa MDA sorkari aro GHADC-ni dilgiparang, MIDC aro MTDC-ni dingtang dingtang kamrangna palskaahachim.
“Ia biaprangko MIDC aro MTDC-na pale cha·aniko jegalna gita an·ching North aro West Garo Hills a·jani B-Mahal ning·o donggipa manderang jinma tom·bimonge chanchirimna nangenga. B-Mahal-ni ning·o bangbang ong·gipa biaprang jakpasaba dongjaha ine nikeba hectare 5000 batpile MIDC aro MTDC-na palaha aro unbaksana Land Holding Certificate-ko nokdangprako bigha gni ka·e on·gen ine B-Mahal-ni ning·o songdonggiparangko sinjetaniara Sixth Schedule-ni niamrangko pe·ani gitaba ong·enga,” ine Save B Mahal Committee-ni chairman parakatenba, ia tom·bimonganiko ong·ataniona re·bae bakko ra·echina gita songni nokmarangko aro songni manderangko didiataha.