SHILLONG: Meghalaya a·doko Inner Line Permit (ILP)-ko ra·gatchina dabie Meghalaya Assembly-o resolution-ko ra·manahaoba da·alonan maming ja·kurangko de·jaengani gimin Mongolbar salo, National People’s Party (NPP)-ni national vice president aro a·dokni Deputy Chief Minister Prestone Tynsong, ma·mongni BJP sorkariko matnangataha.
“Chinga NPP-chi dilgipa MDA sorkari, 2019 bilsion ILP-na resolution-ko pass ka·e, chief minister-ni dilanichi chingni resolution-ko adita dilgiparangni jako watatahachim indiba uamang (BJP) ILP-ni bidingo aro Khasi-Garo ku·sikrangko Eighth Schedule-o napatchina dabianikoba chu·sokatna gisik nangjaenga. Da·o Meghalaya Assembly election-nade BJP-ni manifesto-o ILP-koba mongsonggipa daito dake janapskaaha,” ine Tynsong parakatenba, ia pilakan BJP-ni politics-na dakmikanisan ong·aia ine matnangataha.
ILP aro Khasi-Garo ku·sikrangko Eighth Schedule-o napatani bidingo a·dokni manderang ru·uta bilsirangonin dabiengachim ine janapatengon, da·o election-na skangsa BJP, ia kamrangna gisik nange mesokbaskaenga ine Deputy CM matnangataha.
“Ia pilakan da·o election-na uamangni (BJP)-ni politics kal·anisan ong·aienga. ILP aro Eighth Schedule-ni giminsan ong·aigija chinga taridapgimin MRSSA-koba ra·bana jotton ka·ahachim indiba da·onan ia Home Affairs Ministry-ni ning·on ong·kuenga,” ine Tynsong parakataha.
Ia kamrangara a·dokni manderangna nangchongmotgipa ong·achim ine janapatengon, BJP-ni ia kamrangko chu·sokatna somoi ra·chaaniara gisiko nanggijanikosa mesokani ong·enga ine Tynsong matnangataha.
NPP-o ka·dongchina gita a·dokni manderangko didiatengon, MDA sorkarina skang darang dolrangni jako ra·na ka·donggijagipa kamrangko NPP-sa jako ra·e ka·dilchenggipa ong·aha ine Deputy CM parakataha.
“Meghalaya a·dokni voter-rangde darangna baten seng·batgiparangsa ong·a maina uamangsa an·tangtangni dilgipako seoknagiparang ong·a. Anga bebera·a uamang NPP-mangmangsan indita bilsirangna galchipgipa kamrangko jako ra·e kam ka·gipa ong·a ine uamang ma·siani gimin ia changoba NPP-on an·tangtangni ka·donganirangko mesokgen,” ine Tynsong aganaha.