SHILLONG: Re·anggipa Mongolbar salo, Meghalaya a·doko mikka simani a·sel Union Home Minister Amit Shah-ko bildilbaenggipa helicopter, Shillong songjinmao bilonna gita man·jaha aro ja·mano ua an·tangni mobile phone gita Guwahati airport-oni manderangna aganprakatskaaha.
Mongolbar salo ua Shillong songjinmani biap damgnio, manderangna aganprakangna miksongani dongachim indiba ua salo mikka simani a·sel ua bilongnna gita man·jae Guwahati songjinmaona re·angpilna nangaiahachim.
Guwahati airport-oni an·tangni mobile phone gita aganprakatengon, Meghalaya a·dokni pilak manderangnan chu·gimik chel·chakanirangko on·na gita Union Home Minister, ku·rachakaniko on·ataha.
Ia Assembly election-o BJP-ko seokchina a·dokni manderangko didiatengon, Meghalaya a·doko Tribal ong·gijagipa manderang chadrapako man·rongengani gimin a·doko BJP sorkariko rikna man·ahaode pilak jatrangnan chel·chakanirangko on·na man·gnok ine Shah parakataha.
“Meghalaya a·doko BJP sorkariko rikani ja·mande darangba kenna nangani dongjawaha,” ine ua aganaha.
Assam a·doko jekai BJP sorkari, ta·rakbee namroro silroroaniko ra·bana man·ahachim, apsan daken Meghalaya a·doknaba BJP namroro silroroaniko ra·bana nangnikenga ine Union Home Minister parakataha.
Meghalaya a·dokko tangka paisa jakkalsretani gri ong·gipa a·dok ong·atanian BJP-ni mongsonggipa miksongani ong·enga ine janapatengon, February-ni 27-na skang ua Shillong-ona re·bana man·jagenchimoba March-ni 2 tariko BJP-ni cheaniko manianiode ua re·bae bakko ra·telgen ine Shah, ka·dongchakani gnang parakataha.