PM Modi-ni tom·aniko NPP-sa PA Sangma Stadium-o ong·atna on·ja ine BJP matnangtaia

TURA: Prime Minister Narendra Modi-ni tom·bimonganiko Tura-ni PA Sangma Stadium-o ong·atna on·gijanio uamangni maming jak dongja ine adita salrangna skang a·dokni chief minister aro National People’s Party (NPP)-ni national president Conrad K Sangma talataniko on·ahaoba, ia pilakan NPP-ni miksongmanchae dakanisa ong·a ine Bristibar salo, Bharatiya Janata Party (BJP)-ni dilgipa aro South Tura constituency-ni BJP candidate Bernard N Marak matnangattaiaha.
A·songni Prime Minister Narendra Modi, da·al Sukrobar salni bako Tura-ona re·bae manderangna aganprakangna gita siengachim aro uni gisepon ia tom·bimonganiko PA Sangma Stadium-o ong·atna man·jahani gimin dolgnini gisepo adita jegrikanirangko nikna gita man·skaengachim.
“PM Modi-ni program-ko uamang Tura-ni km 30-mang chel·ao donggipa Jengjal-o ong·atchina gitasa chingko aganahachim aro ia pilakan PA Sangma Stadium-ni obostako dongnuna gita uamangni miksongmanchae dakanisa ong·a,” ine Bristibar salo, BJP-ni dilgipa Bernard Marak, kobor ra·timgipa manderang baksa agangrikengmiting somoio parakataha.
PM Modi-ni program-ko PA Sangma Stadium-o ong·atna on·jahani gimin da·o ia program-ko Sukrobar salo, Tura Alotgre-o gital tarienggipa Cricket stadium-o ong·atskaengachim ine nikna man·a.
“NPP-chi dilgipa sorkarini ning·o bang·en cha·bokanirangko an·ching nikna man·aha maina ma·mong sorkarini kangal cholgrirangna nok rike on·ani, nokantiona chirangko sale on·ani, indin bijoliko on·ani aro uandakgipa dingtang dingtang scheme-rangko ia sorkari chu·sokatchipjaha.
NPP-ni dilanichi MDA sorkariko rikchengani somoio maini gimin BJP-ba bakrimaniko on·aha ine sing·anina aganchakaniko on·angengon, bilsi bongana skangde chief minister Conrad Sangma indakgipa mande ong·jachim indiba da·o ua namen dingtangaha ine Bernard matnangataha.
“2018 bilsini election-ode anga an·tangan una (Conrad)-na campaign ka·achim indiba ua angko tol·e matnange jabrina kal·ake rona jotton ka·aha. Uni giminsa da·o anga ma·mongo dilgiparangni bakrimanichi uni kosako chakatenga,” ine Bernard parakataha.
BJP candidate-ni parakatani gitade, 2018 aro 2023 bilsini election-ara namen dingtanggrika maina ia changode manderang BJP-ko ra·chaktokaha aro ia election-o manderang BJP-ko seokna sienga.