TURA: Badiaba badiaba dolrang, uni Tura-ona re·bae manderangko grongeaniko champengna jotton ka·ahaoba Meghalaya a·dokni manderang, uamangni ka·tongon una biapko on·manaha ine Sukrobar salo, a·songni Prime Minister Narendra Modi, skanggipa changna Tura-ona re·bae manderangna aganprakangani somoio, jinmana parakataha.
“Meghalaya a·dokni manderangna angni ka·saaniko mesokna gita angna dal·dalgipa stadium-rangko nangja. Shillong-o aro angni Tura-ona re·bamitingo manderang, uamangni ka·tongon angna biapko on·manaha ine mesokaha aro ian angna chu·ongbea,” ine PM Modi, Tura-ni Alotgre Stadium-o, BJP-ni candidate-rangna campaign ka·engmiting somoio aganaha.
A·doko songdongenggipa manderangni namgnina engine ge·gni donggipa sorkariko nangenga ine janapatengon, ma·mong sorkarini scheme-rangko name chu·sokate on·na gitade Meghalaya a·doko BJP-chi dilgipa sorkarikosa nangenga ine PM Modi parakataha.
“A·doko ta·rakbate namroro silroroaniko nangengani giminsa manderang BJP sorkariko nangniktokenga. BJP sorkariko rikahaode a·doko bandh-rang aro so·sojengjeng ong·atanirangba dongjawaha. Meghalaya-o BJP sorkariko rikahaode tangka paisa jakkalsretanirangba bon·gnok aro nokdang ge·antian namgipa nokrangko, chirangko aro bijolirangko man·tokgnok,” ine ua aganaha.
Meghalaya a·doko BJP sorkariko rikahaode, chadamberangna kam ka·e cha·ani cholrang, me·chikrangna dakchakanirang aro jatni daka rikanirangko ripinge rakkina cholrangko man·gnok ineba Prime Minister parakataha.
“Dingtang dingtang kamrango ma·mong aro a·dok sorkarirang nangrime kamrangko ka·na nanga. BJP-chi chalaienggipa a·dokrangko niate nibo. Ia a·dokrango namroro silroroani namen ta·rakaha. Batanggimin bilsiskuni gisepo chinga salgro salaram a·dokrangna tangka paisa chamaniko bariate, bang·bea tangka paisarangko on·atahachim indiba maming namroro silroroanirang dongjaenga. Indita tangka paisarangara bachi gimaaha?” ine Modi sing·doangaha.
PM Modi-ni parakatani gitade, a·doko kam ka·e cha·ani cholrang gimatokahani giminba bang·a chadamberangan una badi ka·tokaha.
“Iani giminsa manderang Shillong-o aro New Delhi-o apsan sorkariko ong·atna nangniktokaha. A·doko namroro silroroanina chingo niksamsoani aro bebera·aniba donga,” ine PM Modi aganaha.
Meghalaya a·doko dam 11 a·jarangan gipin a·dokrango nangchapegipa a·jarang ong·a ine janapatengon, a·doko game ge·e cha·enggipa manderangni namgnina BJP, Meghalaya a·dokko samba jolo donggipa a·songrang baksa bakrimatna miksonganirang dongenga ine Prime Minister parakataha.
“Chingni kamko ka·anio chinga darang jat ba torom baseani grian chingni scheme-rangko on·enga maina chinga chingni ma·gipa aro no-abirangni dongtoanikosa nanga. BJP-nade a·song aro a·songni manderangsa gamchatbata,” ine BJP-ko Kristianrangni kosako chakatgipa dol ine matnanganina PM Modi, aganchakaniko on·angaha.
Tribal ministry-na tangka chamaniko BJP sorkari bariataha aro PM-KISAN scheme-oniko lak 2-na bate game ge·e cha·giparang namgnirangko man·enga ine janapatengon, Meghalaya BJP-ni election manifesto-o ia scheme-ni tangkako gong 6000-oniko 8000-ona bariatengani gimin a·dokni BJP-ko PM Modi mittelpilangaha.
Prime Minister Modi-ni tom·anio Garo Hills gimikni sak 24 BJP candidate-rangba bakko ra·angtokaha aro unbaksana Minority Affairs-ni Union Minister John Barla aro Assam Assembly-ni Deputy Speaker Numal Momin-ba dongpae bakko ra·angaha.
Tom·a matchotani ja·man Alotgre Stadium-oni Dobasipara helipad-ona re·angpilani somoio, Prime Minister Narendra Modi, rama gimikan gario chadenge, ramarango uko nirikgiparangko ua jakripripe salam ka·angaha.
