SHILLONG: Meghalaya Assembly election-ni sal sepangbaroroengahaon, batanggimin bilsi bongani gisepo NPP-chi dilgipa MDA sorkarini tangka jakkalsretani aro pilak ong·gija dakgipa kamrangko gisik ra·e, ia election-o dilgipako seokchina gita Meghalaya Trinamool Congress (TMC)-ni dilgipa Mukul Sangma, a·dokni manderangko didiangaha.
Assembly election-na campaign ka·ani somoi da·al Sonibar attam 4:00 bajion matchotengahani gimin Opposition TMC-ni dilgipa Mukul Sangma-ba TMC-ni candidate-rangna campaign ka·aniko ia antini a·bachengaonin bilakbatatahachim aro uandaken ua Garo Hills-ni dingtang dingtang biaprangona wenroroe, dingtang dingtang candidate-rangna campaign ka·angahachim.
“Batanggimin bilsi bongao NPP-chi dilgipa MDA sorkarini ka·namgijaniko manderang nikmanaha. Uni gimin hai an·ching jrip dongaigija ia sorkarini jako kal·ake roa man·gipa manderangko mikrakatskaaha,” ine Sangma aganaha.
Meghalaya Regulation of Gaming Act 2021-ko MDA sorkarini ra·gatna jotton ka·ani giminba ua matnange aganangaha aro ua maming dakeba Meghalaya a·doko joa kal·gipa a·dok ong·atna on·jawa ine parakataha.
“NPP-chi dilgipa MDA sorkarini manderangni kosako chakatgipa niamrangchi aro miksonganirangchi Meghalaya a·dokni manderangko cha·bokaha,” ine Sangma aganaha.
Jal Jeevan Mission (JJM)-ni bidingo janapatengon, Meghalaya a·doko JJM-ni kamrang chu·gimik matchotaha ine NPP-chi dilgipa sorkari, ma·mong sorkarina report-ko on·ataha aro iana ma·mong sorkari, Meghalaya a·dokna boksisrangkoba on·pilaha indiba songadam nokadamrangona re·ange nigenchimode bang·bata songrangon chirangko man·tokgijanikosa nikna man·kuenga ine TMC-ni dilgipa matnangataha.
