SHILLONG: Meghalaya Assembly election-na skang National People’s Party (NPP)-ko tangka paisa jakkalsretanirangna matnangani ja·man da·o apsan NPP-ni dilanichi MDA 2.0 sorkariko rikskaani ja·mande, gitcham MDA sorkariko tangka paisa jakkalsreta ine matnangna maming sakkirang dongja ine BJP-ni national vice president aro Meghalaya-ni in-charge M Chuba Ao parakatskaaha.
Election-ni somoirango pangnan political dolrang, vote-rangko salna gitasa dolsa dolgipinko matnangrongaia ineba Ao ku·rachakaha.
Assembly election-ni somoio, a·songni Prime Minister Narendra Modi aro Union Home Minister Amit Shah-ni a·dokona re·baani somoirangoba NPP sorkari aro Meghalaya a·dokko India a·song gimiko tangka ‘cha·batsranggipa’ ine matnangtokahachim.
Batanggimin bilsi bongana NPP-ni dilanichi MDA sorkario bakrimengmiting somoirangoba BJP, GHADC-o tangka paisa jakkalsretanirangna ku·rangko on·rongahachim aro MDA-o bakrimaniko ra·pilna gitaba ka·mikkenatahachim ine nikna man·a.
Indake ong·genchimoba, da·o election matchotange gital sorkariko rikpiltaiahaon BJP, NPP-chi dilenggipa MDA 2.0 baksa kamrangko ka·rimtaina kusi ong·a gita nikskaengaha.
Election-na campaign ka·engmiting somoirango BJP-ni dilgiparang, Meghalaya a·dokona re·bae NPP sorkariko tangka paisa jakkalsretanirangna matnanggipani gimin sing·on, ia pilakan election-na matnanganirangsan ong·aia aro election-ni somoio matnanganide vote-rangko salna matnanggrikanisan ong·aia ine M Chuba Ao parakataha.
MDA-o bakrimenggipa gipin dolrangkoba mande ra·na nangani gimin Cabinet-o biap damsa man·anikoba BJP chu·ongnikaiaha ineba Ao aganaha.
Tangka paisa jakkalsretanirangko sandirokatgen ine BJP-ni ku·rachakgipani gimin sing·skaon, “Da·o chinga tangka paisa jakkalsretani giminde iano aganjaenga indiba sorkariko name chalaiani giminsa aganenga,” ine Meghalaya a·dokko nirokenggipa BJP-ni national vice president parakataha.