SHILLONG: Ia bilsini Meghalaya Assembly election-ko ong·atanio susagipa candidate-rang bang·dugaani a·sel aro dilgipako seokgipa manderang pripratokahani a·selsa Trinamool Congress (TMC) amako man·aha ine Bristibar salo, TMC-ni dilgipa Mukul Sangma a·kangataha.
Sangma-ni parakatani gitade, Khasi Hills jolrango manderangni dilgiparangko seokanian, an·tangtangni nangnikaniko mesokani gita ong·aha.
Meghalaya a·dokni saliram jolni gimin janapatskaengon, ia jolrangode manderang, dingtanganiko nikna ka·oksiani gnangan dilgiparangko seokahachim indiba apsan biaponin susagiparang bang·dugaaha aro ia susagipa manderang, dingtanganiko nangenggipa manderangko ma·ekatna man·jaha ine TMC-ni dilgipa aganaha.
“Na·simang bang·batan iandakgipa biaprangko nikaha jeon bang·a political dolrang aro bon·kamaode BJP-ba re·bae susapaaha. Uamang (BJP) sorkarini bakan ong·genchimoba, apsan biapon susarimpaaha aro iani a·selan vote-rang pripraatako man·aha,” ine Sangma aganaha.
Ia chang Assembly election-o TMC, seat-rangko bang·en chena ka·dongsoahachim indiba dam 59 constituency-rangoniko dambongakosan chena man·aiahachim ine nikna man·a.
Politics-o tangka paisa aro bilrangko jakkalani gimin janapatskaengon, jakgitelgipa a·songo tangka paisa aro bilrangkosa jakkalgenchimode, namgipa manderangde politics-ona re·baanian ong·jaenga ine Sangma parakataha.
Tangka paisa jakkalsreta ine matnangani ja·manoba NPP-chi dilenggipa sorkario BJP-ni bakrimahani gimin sing·on, a·songni Prime Minister aro BJP-ni gipin dilgiparangan tangka paisa jakkalsretaniko nie dongjawa ine ku·chakani ja·manoba iandakgipa ja·kuko de·aniara uamangni ong·telaianiko mesokanisa ong·enga ine TMC-ni dilgipa parakataha.