TURA: Sak 15 mang bol cha·ue badinggipa manderang mni March 9 tariko West Garo Hills-ni Belbari Halghora sepango GHADC-ni forest personnel-rangko ka·dongbee chamchangenba rakbegipa kattarangchi domki on·e donangahachim aroba forest personnel-rangni ra·sekgimin bol gatgipa garikoba saldrae katangahachim.
Iani bidingo Phulbari Police Station-o FIR-koba ka·aha.
Joltangni manderangni aganani gitade, Rajabala-oni Tikrikilla-ona km 50 mang bate bakrogipa ramani gisepo ritcha batpilen niamgri chalaigipa saw mill-rang dongachim, jeonan plain belt-ni a·bri ja·pangrangoniko bolrangko den·e ra·batokengachim. Unaskangoba GHADC aro state forest personnel-rangba indakgipa apsandakgipa a·sel obostarangkon chagrongahachim.
Belbari, ian Phulbari town-oni km 6-san chel·aia.
Phulbari GHADC range-ni deputy ranger-ni FIR ka·gipao janapani gitade, ka·rongbewal gita sandi-nirokaniko dakmiting chachao, cha·ue bol gate salbaenggipa gariko Wadagokgre jolo rim·a man·soaha. Ja·mano rim·gimin gariko range forest office, Phulbari-ona ra·angmitingosa, sak 15 mang bol cha·e badinggipa manderang Belbari Halghora, forest personnel-rangko chamchangsoahachim.
Koborogita, trak gario tong 17 mang boltongrangko gate salangengachim.
“Uamang chingko ka·namgija kattarangchi ka·mikkenatangaha aro chingoniko garini chabiko ra·sekenba, ra·sekgimin bol gariko sale katangaha, maina ua somoio chinga sakbrisanchim. Indake chingko ka·namgija kattarangchi ka·mikkenatenba gari chabiko ra·seke gariko sale katangaha” ine GHADC-ni Phulbari ranger aganaha.
Denggu manderangoniko forest personnel-rang sakbrikode ma·sirikaha, jemangkon FIR-o biming on·ahachim, uamangara Zakir Hussain, Baharul Islam, Akirul Islam, Soyad Zamal mang ong·achim.
