SHILLONG: Meghalaya Assembly-ni gital Speaker Thomas A Sangma, da·al Sombar pringni 11:30 bajimango, New Shillong Township-ni Mawdiangdiang-o rikenggipa gital Assembly building-ko niegen.
Official-rangni Robibar salo parakatani gitade, Assembly Speaker-ni ia gital building-ko nieani somoio PWD (Buildings)-ni official-rang, ia nokko rikenggipa company-ni official-rang aro contractor-rangba dongpagen.
Ia gital Assembly building-ko nieani somoio Assembly-ni Speaker, kamni gadangrangkoba niangjolgen ine official-rang parakataha.
Ia gital Assembly building-ko ta·raken matchotatanian uni mongsonggipa daito ong·gen ine gital Assembly-ni Speaker-na seokako man·ani somoion Sangma parakatahachim ine nikna man·a.
Ia gital Assembly building-ko rikanio sorkari, bang·bea tangka paisarangko koros ka·na nangaha ine janapatengon, ia gital Assembly nokni protchong be·gruani a·selsa kamrang matchotkujaenga ine Sangma parakataha.
“Anga sikkelede kamrangko ka·jawa aro ia gital Assembly building-ko matchotatna gita anga name nichengesa kamrangko ka·gen,” ine ua aganahachim.
Ia gital Assembly building-ni protchong be·gruani ja·man, re·anggipa 2022 bilsini November jaosa kamrangko a·bachengpiltaiahachim ine nikna man·a.
New Shillong Township-ni Mawdiangdiang-o rikenggipa gital Assembly building-ni protchong, re·anggipa May jani 22 tariko be·gruahani gimin ia protchong-ni be·gruani a·selko Indian Institute of Technology (IIT) Guwahati-ni sak 30 membor donggipa dol, am·sandiangahachim ine nikna man·a.
Koborko on·ani gitade, ia gital Assembly nokni protchong agre jreani a·sel aro ia protchongna bimangko salgipa aro ia nokko rikenggipa contractor-rangni gisepo maming agangrikanirang dongjani a·selsa New Shillong Township-ni Mawdiangdiang-o rikenggipa gital Assembly building-ni protchong, re·anggipa May jani 22 tariko be·gruaha ine iani bidingo am·sandigipa Indian Institute of Technology-Guwahati (IIT-Guwahati)-ba parakahachim.