TURA: Garoland State Movement Committee (GSMC)-ni Eastern Zone-ko songna gita adita salrangna skang, East Garo Hills a·jani Simsanggre-o jinma tom·bimonganiko ong·atangaha.
Ia tom·bimonganio GSMC-ni co-chairman Balkarin Ch Marak, tom·aniona sokbagipa manderangna rimchaksoani kattarangko aganangengon, ‘Garoland’-na dabiani bidingo jinmana agan-talate on·angaha.
Garoland a·dokna dabianiara gital dabiani ong·ja ine janapatengon, 1889 bilsionin A·chik pagitchamrangoni Sonaram R Sangma aro gipin dilgiparangba dingtang a·dokna dabiaha da·oba ia dabianiko GSMC dakdilengkua ine Marak parakataha.
A·chikrangni daka rikani, ku·aganani, bebera·ani aro pilakko chel·chakna gita Garoland a·dokko nangchongmotenga aro dingtang a·dokko man·kujaskal Garoland a·dokna dabianiko dontongkujawa ineba GSMC-ni co-chairman parakataha.
Ia tom·bimonganio GSMC-ni chief adviser Purno K Sangma-ba dongpae jinmana aganprakangengon, Garoland a·dokna dabianiko British-rangni chasongon, Pa Sonaram Rongrokgre Sangma-ni dilanichi a·bachengaha aro uni ja·man dingtang dingtang dolrangba da·onan dabiengkua ine parakangaha.
Ia tom·bimonganio GSMC-ni sakgipin co-chairman Jakrak A Sangma aro gipin dilgiparangba aganprakangaha.
Indake ong·engon, ia tom·bimonganio dingtangmancha GSMC-ni Simsanggre Zone, Eastern Zonal-koba songe, dilgiparangkoba seokangjolaha.
GSMC Simsanggre zone-ko dilna gita seokako man·gipa manderangara, chairman-na Junder Bolwari Marak, co-chairman-na Nathanel Cheran Momin, general secretary-na Salbesh Mongsrang Sangma, assistant general secretary-na Martin Sangma, chief organising secretary-na Jamseng Sangma, organising secretary-na Christbirth Sangma, publicity secretary-na Salman Dawa Sangma, information & public relations secretary-na Tandith Marak, accountant-cum-treasurer-na Haward Agitok Sangma aro sakbonga executive membor-rang ong·a.
