TURA: SSA skulrango skigiparangni dingtang dingtang man·gnirangko on·china didie Sombar salo, All Garo Hills SSA School Teachers Association (AGHSSASTA), a·dokni gital Education Minister Rakkam A Sangma-na sedoataha.
SSA skigiparang, ia bilsini January aro February jani dormaharangko man·kujaenga ine janapatengon, jagni atana skigiparang, an·tangtangni dormaharangko man·kujaengani a·sel dingtang dingtang neng·nikanirangko chagrongna nangtokengaha ine AGHSSASTA-ni dilgiparang, ia jagnini dormaharangko ta·raken watatchina Education Minister-ko mol·molataha.
SSA skigiparang Project Approval Board 2016-17-ni jachetni arrear-rangko da·onan man·tokkujaenga ine janapatskaengon, bilsisni ong·pilahaoba SSA skigiparang ia jachetni arrear-rangko man·kujaenga ine ia jachetni arrear-rangko ta·raken skigiparangna watatchina Education Minister-ko didiataha.
SSA skigiparangna dormaharangko bariatchina gitaba AGHSSASTA, a·dokni Education Minister-ko didiataha.
“2016 bilsionin SSA skigiparangna dormaharangko bariatchipkujaenga aro 2016 bilsio bariatgipa SSA UP skigiparangna 20,493/- aro LP skigiparangna gong 19,044/- dormahakon da·onaba skigiparang man·kuenga. Bilsiantian nangchongmotgipa bosturangni dam rakbatroroengon, indita dormahachi nokdangko chalaianiara ong·na amgijani ong·enga. Uni gimin SSA skigiparangnaba gipin skigiparang gitan apsan dormahako on·china chinga mol·molenga,” ine AGHSSASTA-ni dilgiparang parakataha.
SSA skigiparangni kamko regularise ka·china gitaba AGHSSASTA, a·dokni Education Minister-ko didiataha.
