SHILLONG: Skanggipa changna ong·atenggipa Meghalaya International Film Festival-ko Mongolbar salo, Shillong songjinmani U Soso Tham Auditorium-o a·bachengataha.
Ia film festival-ko a·bachengatani somoio mingsinggipa film star-rang, jekai Adil Hussain, Sanjay Suri, Moon Moon Sen aro gipinrangba bakko ra·angaha.
Ia salbrina ong·atenggipa film festival-ko Meghalaya Film Makers Association (MeFilma) sokachakenga aro ia festival-ko ong·atanio a·songni aro a·gilsak gimikni award man·gipa jawilwatrangko mesokna siengachim.
Ia film festival-ko a·dokni Art & Culture Minister Paul Lyngdoh, a·bachengate on·angengon, ian Meghalaya a·doko dingtang dingtang gadangni jawilwat tarianiko a·bachengatani ong·enga ine parakatenba, a·doktango tarigipa jawilwatrangko mesokna gita sorkari, chu·onga gita cinema hall-rangko on·gen ine ku·rachakaniko on·angaha.
Meghalaya a·doko a·gilsakna aganna nanggipa bang·a golporang donga ine janapatengon, salsaode Meghalaya a·doko tarigipa jawilwatrangba Oscar award-ona sokangpagen ine Lyngdoh, an·tangni ka·dongchakenganiko parakataha.
