TURA: West Garo Hills a·jani ning·o register ka·gimin mitam private garirangko, niam gri para salna jakkaltokenga aro ian Motor Vehicle Act 1988-ni ning·o dongimin niamrangko pe·ani gita ong·enga ine West Garo Hills a·jani Deputy Commissioner Swapnil Tembe parakatenba, iandake private garirangko para salna jakkalgipa manderangni kosako rakgipa ja·kurangko de·anggen ine mikrakataniko on·angaha.
Deputy Commissioner-ni parakatani gitade, West Garo Hills a·jao private garirangko para salna jakkalenggipa manderangko District Transport Officer-ni dilanichi, dingtangmancha Special Task Force sandirokanggen aro niam pe·giparangni kosako Motor Vehicles Act 1988-ni section 53 (1)(b), section 66 aro section 192A-o pangchake rakgipa ja·kurangko de·anggen.
Je gari nokgiparang, an·tangtangni garirangko para salna miksongengachim, dongimin niamo pangchake permit-na dorgastoko galchina gitaba DC u·iataha.
