SHILLONG: Meghalaya a·doko chi banani, a·arang be·ani aro uandakgipa dingtang dingtang a·selrangchi duko ga·akenggipa manderangko dakchakna gita ma·mong sorkari, National Disaster Response Fund (NDRF)-ni ning·o gong kror 47.326 tangkarangko chamdapataha.
2022 bilsini gisepo chi banani, a·a rurongani aro uandakgipa a·sel ong·anirangko chagrongna nanggipa dambonga a·dokrangna ma·mong sorkari, NDRF-ni ning·o tangka paisarangko chamdapataha aro Meghalaya a·dokba ia dambonga a·dokrangoni damsa ong·paaha.
Meghalaya a·dokna baksana ia dambonga a·dokrangoni gipin a·dokrangara, Assam, Himachal Pradesh, Karnataka aro Nagaland a·dokrang ong·achim.
Ia dambonga a·dokrangna ma·mong sorkari, gimik gong kror 1,816.162 tangkarangko chamdapataha aro iako Union Home Minister Amit Shah-ni dilanichi High Level Committee ra·chakangaha.
Ia gong kror 1,816.162-oni gong kror 520.466-ko Assam-na, gong kror 239.31-ko Himachal Pradesh-na, gong kror 941.04-ko Karnataka-na aro gong kror 68.02 tangkarangko Nagaland a·dokna ma·mong sorkari chamdape on·ataha.
Dingtang dingtang a·dokrangna State Disaster Response Fund (SDRF)-ni ning·o ma·mong sorkarini chamatgipa tangka paisarang baksana ia dambonga a·dokrangna ma·mong sorkari, NDRF-ni ning·o tangka paisarangko chamdapataha. 2022-23 bilsio ma·mong sorkari, dam 25 a·dokrangna SDRF-ni ning·o gong kror 15,770.40-ko aro dambri a·dokrangna NDRF-oniko gong kror 502.744 tangkarangko chamatahachim.
