TURA: Adita salrangna skang matchotanggipa Meghalaya Assembly election-na skang, Association for Democracy & Empowerment (ADE)-ni president Dalseng Bira Ch Momin-ko Doldenggagre songona tangka sualna re·angako rim·a ine matnanganiko ADE-ni general secretary aro gipin dilgiparang jegalatskaenba, ia pilakan ADE dolko aro dolni president-ko ong·gija dake biming man·atna gita badiaba dolni jotton ka·anisa ong·aha ine parakataha.
Re·anggipa February-ni 25 tariko, election-na campaign ka·ani somoi matchotani ja·mano, songni manderangna tangka sualna jotton ka·aha ine matnangenba, ADE-ni president baksana adita sak manderangko, Dalu constituency-ni ning·o donggipa Doldenggagre songni manderang rim·ahachim.
Indake ong·engon, ADE president-ni kosako iandake matnanganiko ADE-ni general secretary aro gipin dilgiparang jegalatenba, iani bidingo uamang an·tangtangan sandiroke niaha aro uni kamo maming ong·gijaniko nikna man·jahachim indiba songni mitam manderangsa uko biming man·atna gita uni kosako iandake matnanganirangko dakaha ine parakataha.
Rakesh Newar-ni GHADC-o CEM ong·aniko ADE-ni president Dalseng Bira Momin-na jegaldilaha ine ua biapo donggipa manderang matnangtokahachim ine janapatengon, Rakesh Newar-ko jegalgipa ADE-ni president saksamangmangde ong·ja indiba dingtang dingtang dolrang aro A·chik a·songni manderang pilakan uni kosako jegaltokahachim ine ADE-ni general secretary aro gipin dilgiparang parakataha.
ADE-ni president-ko rim·e dokgipa manderangni kosako FIR ka·aha ine janapatengon, iani bidingo ta·raken ja·ku de·china aro uni kosako ong·gija dakgipa manderangko rim·china ADE-ni dilgiparang dabiangaha.