TURA: Re·anggipa Budbar salo, West Garo Hills a·jani Rongram C&RD Block-ni ning·o donggipa Chinabat bazar-o World Consumer’s Right Day-ko Deputy Commissioner (Supply)-ni gita manidilangaha.
Ia salko manianio Supply-ni Deputy Director R Boro, jinmana aganprakengon, NFSA 2013-ni ning·o man·enggipa dingtang dingtang scheme-rangni bidingo agan-talataniko on·angenba, ePOS device gita mirongrangko ra·na Aadhar-na biming segatna nangani gimin aganangaha. Aadhar-na biming segataniko ia 2023 bilsini March 31 tarikona ra·doatahani gimin Aadhar-ko ration card-rang baksa ta·raken chapatna man·na gita ta·raken Aadhar-na biming segatchina gitaba ua manderangko didiangaha.
Ia tom·anio Tura State Food Commission-ni Membor Dr Greena K Marak-ba dongpae jinmana aganprakengon, ia program-ko ong·ate manderangni bilrangni gimin agan-talatanirangko on·ahani gimin Supply department-ko mittelpilangaha.
Ia program-ko ong·atanio District Consumer Disputes Redressal Commission-ni Membor Lunna A Sangma-ba jinmana aganprakangengon, bree cha·enggipa manderangna on·gimin bil aro daitorangni bidingo talataniko on·angenba, ramram aro dam nom·gipa bosturangchi togiako man·jachina aro nangan somoirango pangnan District Commission-ni dakchakaniko ra·china manderangko didiangaha.
Ia tom·anio Food Safety-ni Assistant Commissioner Tangme Marak-ba jinmana aganprakengon, cha·ani bosturangko breengon, pangnan bosturangko name nichina manderangko didiangenba, fortified rice-ni bidingo agan-talate on·angjolaha.
Ia program-ko ong·atanio department-ni officer-rang, Timbolgre aro Silchichotgre songni Nokmarang aro jolo songdongenggipa manderangba bakko ra·angtokaha.
