SHILLONG: Gital Meghalaya Assembly-o opposition-ni dilgipako songani bidingo jajaanirang ong·kuengon, opposition dolni dilgipako songna gita Trinamool Congress (TMC)-de Assembly-ni Speaker-na pakwate on·skaaha.
Opposition-ni dilgipana Congress dolni gitade Ronnie V Lyngdoh-ko minge donaha indiba TMC-de da·o dipet darangkoba biming minggija, Speaker-ni jakosa pakwate on·skaaiaha.
Iani bidingo kobor ra·timgipa manderang baksa agangrikengon, Opposition dolni dilgipako songanide Speaker-ni jakosa ong·aia aro ia kamko a·kangna gita sak 10 membor-rang dongna nanga ine Constitution-o maming niamrang dongja ine TMC-ni state president Charles Pyngrope parakataha.
“Opposition-o VPP, Congress aro TMC dolrang dongani gimin Assembly-ni Speaker, an·tangni namnikani gita ja·kuko de·china,” ine Pyngrope aganaha.
Congress dol baksa TMC bakrimna miksonganirang dongama ine sing·anina aganchakaniko on·angengon, “Iano adita ma·sisretanirang donga gita nikenga. Opposition dolni dilgipako a·kangna gita sak 10 membor-rang dongna nanga ine Constitution-o dongimin niamrang dongja. Iandakgipa niam dongan dongja,” ine TMC-ni state president parakataha.
“Uni gimin chinga sakbonga membor-rang donggipa dolgni bakrimgenchimoba uan bakrimanisan ong·aigen indiba Opposition-ni dilgipako seokanide ong·jawa,” ine Pyngrope aganaha.