120 Bn CRPF-ni civic action program-ko EGH aro WGH-o ong·ata

TURA: Adita salrangna skang, 120 Battalion CRPF dolni Commandand Pramod Kumar Singh-ni dilanichi Civic Action program-ko East aro West Garo Hills a·jarango ong·atangaha.
Ia civic action program-ni bak gita sal 10-na computer-ni bidingo training-ko East Garo Hills a·jani Williamnagar-o donggipa Navodaya Vidyalaya-o ong·atenga aro ia training-o chatro chatrirangna skie on·na gita jakkalenggipa computer ge·gni aro printer-ko, training matchotani ja·man CRPF dolni sipairang, ia skulnan on·gilatgnok ine u·iataha. Ia training program-ni ja·man, dingtangmancha IT training institute baksa bakrime, jagittamni computer course-koba on·anggen aro ia course-ko matchotgiparangna certificate-rangko on·gen ineba u·iataha.
Ia civic action program-ni bak gita chatro chatrirangna aro kamgri ong·e dongenggipa chadamberangna career counselling program-koba ong·atanggen.
Indake ong·engon, West Garo Hills a·jaoba civic action program-ni bak gita Sasatgre songni manderangna 120 Bn CRPF sipairang, ge 41 solar lamp-rangko suale on·angaha.
Program-ko matchotatani somoio songni manderangna aro bi·sarangna sweet-rangkoba suale on·angaha aro mikkangchiba ia songona re·bae manderangni namgnina iandakgipa program-rangko ong·atangkuna gita 120 Bn CRPF-ni commandant, ku·rachakaniko on·angaha.