SHILLONG: Gital seokako man·gipa Meghalaya Legislative Assembly-ni skanggipa budget session-ko da·al Sombar saloni a·bachengatengaha.
Ia budget session-ni skanggipa salo, a·dokni Governor Phagu Chauhan, Assembly-ni membor-rangna aganprakanggen aro uni aganprakani ja·man, Assembly-ni gital Deputy Speaker-ko seokna gita joljol election-ko ong·atanggen.
Gital Deputy Speaker-ko seokanio, da·o dipet opposition dolrangoni darangkoba susaata dongjaengani gimin Resubelpara-ni NPP MLA Timothy D Shira, maming jegalani gri, gnigipa changna speaker-ni kamko jako ra·angna sienga.
Governor-ni aganprakanggipa kamrangni bidingo, a·dokni Chief Minister Conrad K Sangma, March-ni 21 tariko aganchakaniko on·angskagen aro 2023-2024 bilsina tarigipa budget-ko ua, March-ni 24 tariko mesoke on·anggen.
Voice of the People’s Party (VPP) parliamentary party-ni dilgipa Ardent Miller Basaiawmoit-ni parakatani gitade, ia budget session-o uamang, VPP-ni election manifesto-o janapgipa dingtang dingtang kamrangni gimin sorkariko sing·doanggen.
Meghalaya a·doko Inner Line Permit (ILP)-ko ra·gatchina gita ma·mong sorkari baksa agangrike, a·doko niam gri napsrukanirangko champengchina gitaba ua a·dok sorkario dabianggen ine Basaiawmoit parakataha.
Reservation policy-ko gital dake nipiltaina nangengani giminba ua Assembly-ni budget session-o chanchirimaniko dakdilanggen ineba VPP-ni president parakataha.
