SHILLONG: Assam a·dok baksa meligrikna man·jaenggipa bangki damdok biaprangoba tom·tomaniko ra·bapilna gita sorkari kamrangko ka·angkugen ine Sombar salo, a·dokni Governor Phagu Chauhan parakatenba, da·o dipet a·doko pilakni gitan tom·tomaniko nikna man·enga ine talataniko on·angaha.
Assembly-ni Budget Session-ko a·bachengatani salo ua aganprakangengon, a·doko namroro silroroaniko ra·bana gitade manderangna naljokani, tom·tomani aro chel·chakanirangko on·na man·na nanga ine Chauhan parakataha.
Governor-ni parakatani gitade, Mukroh songo a·sel ong·aniko sandirokna gita a·dok sorkari Judicial Commission-ko songe on·aha aro a·sel ong·anio sianggipa manderangna aro uamangni nokdangrangna kakket bichalko on·na gita kam ka·enga.
Sima jolrango songdongenggipa manderangna naljokaniko on·na man·na gita damsni border outpost-rangko sorkari parakataha ineba Chauhan aganaha.
Indian Constitution-ni niamo Hynniewtrep National Liberation Council (HNLC) bobil dol, sorkari baksa agangrikna re·baaha ineba Governor, Assembly-o parakataha.
HNLC bobil dol baksa agangrikani a·bachengaha ine talatangengon, “Bobil dol baksa agangrikaniko ta·raken matchotatna a·dok sorkari krengenga. HNLC bobil dol baksa agangrikanio bakrimaniko on·engani gimin chinga India sorkarikoba mittelpilna ska,” ine Chauhan parakataha.
Ru·utbea bilsirangna Assam aro Meghalaya a·dokni simarango meligrikna man·jaenggipa biaprangko namatna gita ja·ku de·anian ia sorkarini chu·sokatgipa kamrangoni mingsa ong·aha ineba ua aganaha.
Governor-ni aganani gitade, baditaba chang tom·ani ja·man meligrikna man·jaenggipa dam 12 biaprangoni mingdok biaprangko, chong·motan Tarabari, Gizang, Hahim, Boklapara, Khanapara-Pillangkata aro Ratacherra jolrangko skanggipa bako namatchengna gita a·dok damgnian jako ra·chengaha.
A·dok damgnion cabinet minister-rangni dilanichi regional committee-rang, ia songrangona re·ange manderang baksa agangrikaha aro ja·mano ia regional committee-rangni report-rango pangchake Assam aro Meghalaya a·dok damgnini chief minister-rang, Union Home Minister-ni mikkango MoU-o soi ka·grikaha ineba Governor Chauhan parakataha.
Assam aro Meghalaya a·dokni gisepo meligrikna man·jaenggipa bangki damdok biaprangkoba da·o a·dok sorkari namatna gita kamrangko a·bachengengaha ineba ua aganaha.
Niam retirangko rakkian baksana Meghalaya Police, dingtang dingtang case-rangni bidingo sandirokanirangkoba namdapatna gita krengenga ineba Governor parakataha.
“Meghalaya Police-ni sandirokani kamrangko namdapatahani a·sel 2021 bilsio chargesheet ka·ani 32.2 percent ong·aoni 2022 bilsiode chargesheet ka·ani 39.76 percent-ona tang·doangaha,” ine Chauhan aganaha.
Pekatgipa samrangko champengna gita Meghalaya Police-ni kam ka·anirangko janapatskaengon, 2022 bilsioni gong kror 71 ong·gipa samrangko rim·na man·aha aro gong lak 60 tangkarangko police-rang sekna man·aha ine Governor parakataha.
A·doko police-rangko bilakbatatna gita ka·enggipa kamrangni gimin janapatskaengon, batanggimin adita bilsirangni gisepo a·dok sorkari, dambonga fire & emergency service station-rangko, damsku police outpost-rangko aro dambonga gita police station-rangko kulidapna parakataha ine Governor parakataha.