TURA: March-ni 20 aro 21 tarikrango, Tura Mason Phillips Academy-ni Social Work Department-ni gita World Social Work Day-ko Tura-o maniangaha.
March-ni 20 tariko, ia World Social Work Day-ko Mason Phillips Academy-ni Social Work Department, Tura-ni Leprosy Colony-o maniangaha, jeon Mason Phillips Academy-ni Guest faculty Elizabeth Sangma, jinmana aganprakangaha.
Leprosy Colony-o ia program-ko ong·atanio MPA-ni MSW aro BSW chatro chatrirang, pekatgipa samrangko jakkalani namgijani aro lekka porani gamchatani bidingo minggni dake dakmesokangaha.
March-ni 21 tarik Mongolbar saloba MPA Social Work Department-ni gita ia World Social Work Day-ko Tura-ni District Auditorium-o maniangaha aro ia salko manianio Tura-ni Assistant Commissioner Sumith Kumar Singh, mongsonggipa sokgipa ong·e jinmana aganprakengon, songsal-o social work ba manderangna dangdike on·ani bidingo didiani kattarangko aganangaha.
Ia World Social Work Day-ko manianio minggittam session-rangkoba ong·atangaha aro ia session-rango agan-talate on·anggipa manderangara, Tura-ni DSP Walsall M Momin, Tura ICDS office-ni CDPO Victoria D Sangma aro Tura ICEU-ni Staff Worker Silme Ch Momin ong·a.
Ia session-rangko MPA-ni Administrator Dr Merril N Sangma dilangskaaha.