SHILLONG: Ma·mong sorkarini chamatgipa Jal Jeevan Mission (JJM)-ko December 2022-o a·doko matchotatna gita man·jaha indiba re·baenggipa April, 2024 bilsiode chu·gimikkon man·chotatna ka·dongenga ine Chief Minister Conrad K Sangma Assembly-o parakataha.
“Somoi donsogimin 2022 bilsiode JJM-ko matchotatna gita man·jaha indiba ian an·ching bilsokjahade ong·ja, a·song gimiko December 2022-ko bon·kamgipa somoi dake dongipade an·ching a·doksan, ong·jaode a·songni target ba nisanan 2024-sachim” ine Governor-ni aganprakanggipani bidingo talatangaha.
Ua indakeba parakatkua je a·dok dongspa 54% kamrangkoba chu·sokatgen, jenan kingkot kang·kare kaenga. “Ian rakbegipa kam ong·a indiba re·mikkangna chinga raken kam ka·enga,” Pa Sangma aganaha.
Mitamprak biaprango ia JJM project-ko namen dakjani gimin suk ong·gijanirangko aganan baksa matnanganirangna aganchakengon, “Anga iako ra·chaka, an·ching iako jako ra·engon, pilakande tiktak ong·nade man·ja, banobarade iako sokate on·anio haida chu·sokjanaba donga. Maina ia JJM project indakpile dal·gipa project-de ong·ja. Iako jako ra·anio namen ra·biani gnang, neng·nikanirangko amna an·ching maikobade dakna nanggen,” Chief Minister aganaha.
JJM-ko jako ra·ani kam namen raka, “dolsa third party-ni ka·donganiko aro namgipa audit-ko on·jana kingkingde India Sorkari tangka-paisarangko on·atja. Ia mingsa rakbegipa kam ong·a. Dolsa third party, program aro kam ka·anirangko nichenga, uni ja·mansa tangkarangko on·ata,” Pa Sangma aganaha.
Pa Sangma agana je, a·dokni lak 6.5 nokdangrang JJM-ni namgniko man·gen. “Meghalaya-an, a·songni gisepo namjabatsranggipa ong·achim. An·chingo ge 4,550 nokdangrangan pipe-chi chi sale on·ako man·giparang dongaia, jean 1%-na mangba komibatachim. Indiba da·alo an·chingan nambatsranggiparangoni damsa ong·skajok,” ua aganaha.
