U·IATTIMGIPAONI
TURA: A·gilsakni gipin biaprango gitan Garo Hills-ni dingtang dingtang biaprangoba World Tuberculosis (TB) Day-ko Sukrobar salo maniangtokaha.
West Garo Hills a·jao ia World TB Day-ko National Tuberculosis Elimination Programme (NTEP)-ni gita Edenbari Health & Wellness Centre-o manidilangaha aro ia program-ko ong·atanio Garo Hills Division-ni Joint Director Dr LS Ch Marak, jinmana aganprakangengon, TB saenggipa manderangko nirok sandienggipa aro sanna bananirangko on·enggipa manderangna mittelpilaniko on·angenba, somoi gita sanna bananiko ra·e TB saaniko namatchina aro sorkarini indin on·enggipa dakchakanirangko ra·china TB saenggipa manderangko didiangaha.
Ia tom·anio West Garo Hills a·jani District Tuberculosis Officer Dr EA Sangma-ba dongpae jinmana aganprakangengon, manderangko an·seng baljoke rakkina aro TB saani bidingo manderangna mikrakataniko on·na gita a·gilsak gimikon ia World TB Day-ko manienga ine parakataha.
2025 bilsini gisepon TB saaniko bon·atsrangna gita India sorkari kamko ka·enga ine janapatengon, iana sorkari, indin sanna bananirangko aro samrangko on·enga ine Dr Sangma parakataha.
Ia salko manianio essay sesusaani aro noksa salsusaanirango chegipa chatro chatrirangna, Dr LS Ch Marak-ni jakchi boksisrangkoba on·angaha.
Apsan daken, East Garo Hills a·jaoba ia World TB Day-ko Rongjeng Reserve UP School-o maniangaha aro ia salko manianio Dambo Rongjeng C&RD Block-ni BDO Ruby Balkame R Sangma, mongsonggipa sokgipa ong·e bakko ra·angaha.
Ia tom·anio ua jinmana aganprakangengon, be·en aro gisikni gita an·seng baljokgiparang ong·china, songsalna aro samtangtango ong·telaigiparangna simsakgiparang ong·china chatro chatrirangko didiangaha.
Ia program-ko ong·atanio dongpae jinmana aganprakanggipa gipin manderangara, East aro North Garo Hills a·jani District Tuberculosis Officer Dr CPM Sangma, Rongjeng CHC-ni M&HO Dr Babukan G Momin, Rongjeng Reserve UP School-ni Principal Vincent Sangma aro gipinrang ong·a.