U·IATTIMGIPAONI
SHILLONG: Meghalaya a·dokni Roster System-ara High Court-ni on·gimin hukumsa ong·ani gimin iako jegalenggiparangara High Court-ni hukumko jegalani gitasa ong·enga ine Robibar salo, National People’s Party (NPP)-ni state president aro Rajya Sabha-ni MP Dr WR Kharlukhi parakataha.
“Ian High Court-ni rai on·anisa ong·ani gimin iano a·dok sorkaride mamingkoba dakna man·jachim indiba uamang High Court-ni hukum on·anikon sing·dopilenga,” ine Voice of the People’s Party (VPP)-ni Roster System-ko jegale, jingjengatna ka·mikkenatgipani bidingo Kharlukhi aganaha.
A·dokni Roster System-ni bidingo da·o ong·atenggipa Meghalaya Legislative Assembly-ni Budget Session-o chanchirimna gita somoiko man·jaengani gimin re·anggipa Sukrobar salosan VPP, a·dok sorkarini kosako jegale ramarango jingjengatna ka·mikkenataniko on·angahachim.
Roster system-ni bidingo badiaba political dilgipa ku·rang on·ani ja·man High Court-ona ra·angani ja·mansa High Court raiko on·aha ine janapatengon, ua iani bidingo ma·sijaesa ku·rangko on·ahachim ine NPP-ni state president parakataha.
Meghalaya High Court-ni ge·etanio pangchakesa Roster system-ko tariaha aro iano a·dok sorkaride maming jak dongja ine Chief Minister-ni talatgipa kattarangko gisik ra·attaiengon, ua Chief Minister-ni agangipa kattarangna chakpaaniko on·enga aro iako saoba jegalenga ong·ode iano NPP-ni gita maming bak dongjawa aro ua High Court baksasa jerako ra·enga ine Kharlukhi parakataha.
Meghalaya Reservation Policy-o pangchakesa High Court, ia Roster System-ko tarin agita hukumko on·aha ineba NPP-ni state president parakataha.