U·IATTIMGIPAONI
SHILLONG: Re·anggipa March 23 tarikoni 25 tarikona a·song gimikni Vice Chancellor-rangna National Conference-ko Ri Bhoi a·jao donggipa University of Science & Technology Meghalaya (USTM)-o ong·atangaha aro ia conference-ni bon·kamgipa salo, Assam a·dokni Governor Gulab Chand Kataria, mongsonggipa sokgipa ong·e bakko ra·angaha.
Ia Vice Chancellor-rangni National Conference-ko New Delhi-o donggipa Association of Indian Universities (AIU), USTM baksa nangrime ong·atangaha aro ia conference-ni bon·kamgipa salo, Shiksha Sanskriti Utthan Nyas-ni National Secretary Atul Kothari, Meghalaya a·dokni Education Minister Rakkam A Sangma, Assam a·dokni Education Advisor Dr Nani Gopal Mahanta aro gipin dilgiparangba bakko ra·angaha.
Ia National Conference-ko ‘Transformative Higher Education for Atmanirbhar Bharat’-ni bidingo ong·atangaha aro ia conference-ko matchotatani salo, Assam-ni Governor, jinmana aganprakangengon, India a·songan bida budio, on·kanganio aro dangdike on·anio a·gilsakna skie on·gipa ong·taigen ine parakangaha.
AIU aro pilak Vice Chancellor-rangko mittelpilangengon, ia conference-o bakko ra·ahani gimin ua, salgro salaram a·dokrangkoba mittelpilangaha.
“Nambegipa university-ko kuliahani gimin anga USTM-ni Chancellor Mahbubul Hoque-ko mittelpilna ska. Ian manderangni university ong·chongmota,” ine Assam-ni Governor aganaha.
Ia tom·anio jinmana aganprakanggipa gipin manderangara, Meghalaya a·dokni Education Minister Rakkam A Sangma, AIU-ni Vice President aro USTM-ni Vice Chancellor Prof GD Sharma, AIU-ni Secretary General Dr Pankaj Mittal aro gipinrang ong·a.
Ia National Conference-ko March-ni 23 tariko a·songni gitcham President Ram Nath Kovind do·ga oe on·angahachim aro ia salgittamna ong·atanggipa national conference-o a·song gimikoni sak 500-na baten Vice Chancellor-rang aro gipin official-rang bakko ra·angahachim.