SHILLONG: Mawmluh Cherra Cement Limited (MCCL)-ko tangchaatpiltaina gita nangenggipa gong kror 200 korosrangko on·na man·genma man·jawa ine Mongolbar salo, Voice of the People’s Party (VPP)-ni MLA Ardent Miller Basaiawmoit, a·dok sorkariko sing·doangaha.
MCCL-ara 1960 bilsirango Sohra-o a·bachengatgipa cement company ong·e a·doko gitchambatsranggipa aro a·dokni damsamangmang company ong·achim indiba ia company-ko chalaianio bang·en noksan ong·atako man·ahani gimin ia company-ko chalaianio neng·nikanirangko chagrongna nangahachim.
Iani bidingo Assembly-ni Question Hour-o chanchirimna ra·baengon, MCCL-ko tangchaatpiltaina man·genchimode iako a·dok sorkarini public sector undertaking (PSU) dake rakkina man·genchim ine Basaiawmoit parakataha.
Basaiawmoit-ni parakatani gitade, ia a·dok sorkarini PSU-ara Sohra aro samba jolrango songdongenggipa manderangna janggi tangani cholko on·gipa gita ong·achim.
“Angni chanchiani gitade, MCCL-ko sorkari gipin company-rang baksa bakrime chalaina tik ka·genchimode ian ia cement company-ko gimaataniona ra·baani ong·gen,” ine VPP MLA aganaha.
Jaintia Hills-o chalaienggipa gipin company-rangni cement company-rangko aro MCCL-ni dingtanggrikaniko sorkari name nichengna gita nanga ineba Basaiawmoit, ku·pattianiko on·angaha.
Kolkata-ni Bhavika Commercial Private Limited (BCPL) baksa nangrime ia MCCL-ko chalaina miksongenga ine agananiranga kakket ong·ama ong·ja ineba ua a·dok sorkariko sing·doangaha.
Basaiawmoit-ni parakatani gitade, ia cement plant-ko MCCL-ni gitcham chairman Wailadmiki Shylla, Kolkata-ni BPCL-na pakwatmanaha ine songbadrango seanirangko ua poraimanahachim.
Uni sing·anirangna a·dokni Chief Minister Conrad K Sangma aganchakaniko on·angskaengon, gong kror 350 tangkarangko gapatahaoba MCCL-ko tangchaatpilna man·jahani giminsa ia cement company-ko PPP mode-o chalaiskana private company-rangko okamna nangaha ine parakataha.
“2006 bilsioni da·alona kingking gong kror 350 tangkarangko MCCL-na on·aha aro batanggimin bilsi bongani gisepon dormaharangko aro gipin grorangko chotna gita gong kror 100 tangkarangko on·aha,” ine Assembly-ni Question Hour-o Chief Minister aganaha.
Bang·bea tangka paisarangko koros ka·ani ja·manoba MCCL-ko tangchaatpiltaina man·jaenga ine janapatengon, iani giminsa sorkari da·o ia cement plant-ko PPP mode-o chalaina cholrangko niskaengachim ine Sangma parakataha.