SHILLONG: Ge·dok department-rang grant-in-aid dake man·sogipa gong kror 2,275.33-ni utilisation certificate-rangko on·chipkuja ine Comptroller & Auditor General (CAG)-ni gital report-o parakaha.
CAG-ni report-o parakani gitade, ia department-rangoni Community & Rural Development (C&RD) department gong kror 1,137.40, Planning department gong kror 457.58, Health & Family Welfare department gong kror 272.22, Social Welfare gong kror 198.99, Education & Human Resouce gong kror 171.78 aro Border Areas Development department gong kror 37.36-ni utilisation certificate-rangko on·chipkujaenga.
UC-rang dongjani a·sel ia department-rangna chamatgipa tangka paisarangko jakkalama jakkalja ma·sikujaenga ineba CAG-ni report-o parakaha.
“Ia tangkarangko man·soani ja·man department-tangtangni bank account-rango donengkuakon ine chanchichipenga. Department-rangni submit ka·gipa UC-rang gride, department-rangna chamatgipa tangka paisarangni gimin aro kamrangni gimin ma·sina man·jawa,” ine CAG-ni report-o parakataha.
Indake ong·engon, Meghalaya a·dokni autonomous district council (ADC)-rangba ma·mong sorkarini chamatgipa mongsonggipa tangka paisarangni utilisation certificate (UC)-rangko on·na man·kujaenga ine CAG-ni report-o parakataha.
Report-o parakani gitade, 2017 bilsioni 2022 bilsiona ma·mong sorkarioniko man·sogipa gong kror 385.71 tangkarangoni gong kror 129.63-ni UC-rangkosan a·dokni ADC-rang on·na man·engkuachim.
“JHADC aro GHADC-ni Fund Rules-o pangchake, bilsini account-rangko bilsiantian June 30 tarikni gisepo PAG (Audit)-na on·ani ong·achim indiba KHADC-ni Fund Rules-o account-rangko on·ani tarikrangko janapani dongskaja. ADC-rangni account-rang bilsignioni bilsidokmangona kingking bangki dongkuengachim,” ine CAG-ni report-o parakaha.