SHILLONG: Meghalaya a·doko tangka paisani gita neng·nikanirangko NPP-chi dilenggipa MDA sorkari chagrongna sienga ine Robibar salo, Meghalaya Pradesh Congress Committee (MPCC)-ni president aro Shillong-ni Lok Sabha MP Vincent Pala parakataha.
Tangka paisarangko ra·srorongengani a·sel a·dok sorkari, gro jinang bang·naba gnang ine mikrakataniko on·angan baksana a·dokni ge·dok department-rang, gong kror 2200-ni utilization certificate-rangko on·chipkuja ine CAG-ni parakatani ja·man, iako MPCC-ni president ku·watsoaha.
Iani bidingo kobor ra·timgipa manderang baksa agangrikengon, ia report-rangde kosakgilgilkosan mesokengkua aro ning·ode baditan bang·kuenggen ine Pala parakataha.
“Ia sorkari da·o dal·bea neng·nikaniko chagrongenga aro mikkangchide ia neng·nikani batroroanggnok,” ine ua aganaha.
Sorkariko chalaianide gam-jinrangko jakkale roani ong·ja indiba an·tangtangko on·kange kam ka·anisa ong·a ine janapatengon, ia sorkaride gam-jinrangko jakkale rogipa sorkarisa ong·skaenga ine MPCC-ni president parakataha.
Meghalaya a·doko kajinarang bang·en gimaenga ine an·tangni suk ong·gijaniko parakatskaengon, a·dokko loan-rarachide chalaina man·jawa aro kajinarangko name chimongna nangchongmota ine Pala aganaha.
Adita salrangna skangsan a·dok sorkari, gong 2500-2600-mangni deficit budget-ko pass ka·angaha aro grorangchi ian batroroanggen ine janapatengon, a·dokni namgnina pilak dakgualanirangko ta·raken namatchina gita ua a·dok sorkariko didiangaha.
