TURA: Ia sal somoirango salantian Meghalaya a·dok gimikon bijoliko kimitrongengon, salo kontasnimang batpile bijoliko kimitengani gimin Garo Hills-ona bang·a manderangan suk ong·gijaniko parakattokaha.
Tura-o pring 5:00 bajioni 9:00 bajiona joljol bijoliko kimitani ja·man attamoba 3:00 bajioni 5:00 bajiona kimite, chi waloba 10:00 bajioni 11:00 bajiona kimittaiengachim ine nikna man·a.
Indake ong·engon, pringo kontabri bijoliko kimitani ja·manoba attamo kontagni aro walo kontasa kimittaiengani gimin Tura-o songdongenggipa bang·a manderang, an·tangtangni neng·nikanirangko parakattokaha.
“Pilakan ma·sia pringode an·ching dedrangrangko skulrangchi watatna gita pangnan sikket bakket dake kamrangko ka·na nangronga. Bi·sarangna cha·ani ringanirangko tariani, skul uniform-rangko iron ka·ani aro uandakgipa kamrang bang·en donga. Bang·bata skulrangan pring 8 ba 9 bajirangoni a·bachengani gimin kamrangko 7 bajirangode matchotna nangachim indiba da·o pring 5 bajioni 9 bajiona bijoli kimitengani a·selan chinga kamrangko ka·anio namen neng·nikanirangko chagrongna nangtokenga. Bijoliko pring 5:00 bajioni 7:00 bajiona kontagni kimitoba namkuachim,” ine Tura-ni me·chikma saksa suk ong·gijaniko parakataha.
Bijoliko somoi gita kimitan baksana badiaba badiaba somoirangode nangana batpile bijoli siengani a·sel neng·nikanirangko chagrongna nangtokenga ine me·apa saksa parakatskaaha.
“Load shedding-ko pringo kontabri, attamo kontagni aro walo kontasa ka·eba badiaba badiaba somoirangode nangai nangjaeba bijoli sie rokuenga. Da·o gita ding·karini somoio indake bijoliko kimitna nanggenchimode maikai dongna cha·na man·gen?” ine ua sing·doataha.
Meghalaya a·doko load shedding-ko ra·gatengani a·sel ba bijoliko kimitengani a·sel manderang neng·nikanirangko chagrongna nangtokengoba chol ong·teljaengani gimin wachi a·bachengkujaskalde kimitangkunaba gnang ine adita salrangna skangsan Power department-ni official saksa parakatskaahachim.
Iani bidingo kobor ra·timgiparangna talataniko on·angengon, Umiam dam-o chirang komiahani gimin MePDCL, bijoliko kimitna nangao ga·aktelenga ine Power department-ni official saksa parakatahachim.
Meghalaya a·doko nangani kri bijoliko man·jaengani gimin bijoliko somoi gita kimite watna nangenga ine adita salrangna skangsan a·dokni Chief Minister Conrad K Sangma-ba parakatahachim.
