SHILLONG: Milsi pe·susaani ba na·tok rim·susaanirangko ong·ataniara joa kal·ani ong·jagenchimoba a·dokna kajinarangko man·dapani cholrang donga ine Budbar salo, a·dokni Revenue & Disaster Management Minister Kyrmen Shylla parakataha.
Shylla-ni parakatani gitade, chengonin Meghalaya a·dokni manderang milsi pe·na ba na·tok rim·na namnikgiparang ong·ani gimin milsi pe·susaani ba na·tok rim·susaanirangko ong·ataniara joa kal·aniode maming nangchakeani dongjachim.
“Milsi pe·aniara manderangni mingsa dake rona namgnikgipasa ong·ani gimin anga an·tangde milsi pe·susaaniko joa kal·ani ine aganna man·jawa,” ine Shylla aganaha.
Indake ong·genchimoba da·ororo milsi pe·susaanirangko ong·atanio chitti kole kal·anirangkoba ong·atrongengani giminsa mitam manderang, iako joa kal·ani ine aganenga indiba milsi pe·aniara chengonin a·doko songdongenggipa manderangni dakna namgnikgipa kam mingsa ong·a ineba Revenue Minister talataniko on·angaha.
Lucky draw ba chitti kole kal·anirangko ong·atengon, uamang a·dokna kajinarangko gamskachina gita sorkari niatna gita nanga ineba ua aganaha.
“Uni gimin iandakgipa kal·susaanirangko ong·atanichi a·dokna kajinarangko man·dapna gita deputy commissioner-rangan nirokna nanga,” ine Shylla aganaha.
Chitti kole kal·anirangko ong·atenggipa manderang, tangka paisarangko man·engani gimin a·dok sorkarina kajinarangko gamanio maming neng·nikanirang dongna gita nangja aro jeko dakengoba niam gita ong·na nanga ineba ua aganaha.