TURA: Re·anggipa April 3 tarikoni a·bachenge April 6 tarikona ICFAI University Tura Campus-ni Varsity Week-ko ‘Bilsunina Miktakala’ ine pangchakaniko donenba salbrina university campus-o ong·atangaha.
Ia Varsity Week-ko salbrina ong·atanio ICFAI University-ni chatro chatrirang, Red House (Riprap), Blue House (Chima), Green House (Nokrek) aro Yellow House (Durama) dolrango bakko ra·e dingtang dingtang susaanirango bakko ra·angtokaha.
Ia Varsity Week-ko ong·atanio essay sesusaani, noksa salsusaani, aganpraksusaani, mobile-chi photo ka·susaani, me·chikrangna robol gosusaani, git ring·susaani aro jatni kal·susaanirangkoba ong·atangaha.
Dingtang dingtang susaanirango Red House (Riprap) 330 point-rangko man·e chegipa ong·aha aro uni ja·man Blue House (Chima) 255 point-rangko man·e gnigipa biapko man·rikskaaha.
Ia bilsio ICFAI University Tura Campus-ni Varsity Week-ko ong·atna man·ahani gimin ICFAI University-ni Advisor VSB Sangma, an·tangni kusi ong·aniko parakatengon, ia university-ni Varsity Week-ko baditaba bilsirangni ja·mansa ong·tattaina man·aha aro mikkangchiba ia program-ko ong·atangkuna man·gen ine an·tangni ka·dongchakenganiko parakataha.