SHILLONG: Shillong-o shobha yatra ong·atmiting somoio jedakgipa chrik a·bokanirangko dakangja ine Vishwa Hindu Parishad jechakangaha.
Uamangni gita April 7 tariko Hanuman Jayanti rally-ko ong·atangjaha, ine VHP Meghalaya General Secretary, Pawan Sancheti aganataha.
“Ram Janam Utsav-ko Shillong-o March 30 tarikoni April 1 tarikona VHP maniangaha aro April 2 tarikona joljol Shobha Yatra (re·jomani)-ko dakangaha. Kakketko aganode, ia re·jomaniko bilsiantian dakrongenga aro hindu toromni dilgiparang gisiko nangen bakko ra·angaha. Programme-ko dongimin niam-o district administration, police-ni superentendent aro traffic sipairang jemangan dongimin somoina skang name tom·tome yatra-ko matchotatna chu·gimik dakchakaniko man·an baksa nama bewalo dakangna man·aha.” ine VHP dilgipa aganangaha.
Uamang pilak torom-ni chanchianiko mande ra·a aro a·dokni manderangko chubata gadango mande ra·a, ine ua aganangaha. Olakigiparangchi “Jai shree Ram” tariaha aro “Jai shree Ram” bakoni jeni miksonganian Rama isolna rasong ong·china inesan chrikangaia, maming gipin kattarangko minge shobha yatra-ko ong·atmitingo chrik a·bokanirangko dakangja, ine ua agandapangaha.
“Pangna jolnan a·doko toromni gita tom·tomaniko rakkiangna VHP on·kanga,” ine ua aganangaha.
VHP-oni Shri Shri Hanuman Jayanti Utsav Samiti an·tangko chel·tange donganiko DC-na seachi u·iataha.
Uamangni gisiko dakangna sikani dongengako aro VHP baksa nangchapatanina manderang aro dolrang matnangataha, uamangni chanchianirang VHP-oni namen dingtanga ine samiti rongtalen aganataha. Chingni community-na toromni manianirango Hanuman Jayanti Utsav Celebration Solely-na changsano kamko matchotaianiko dakanga. Chinga VHP baksa ba gipin dolrang baksa maming nangrima dongja, ine Samiti-ni organizing secretary aganangaha.
Hanuman Jayanti Utsav manianiko uamangni gita bilsi 50-na bate manibaengachim aro ian bilsi 51 gapenga, dingtang dingtang toromrangni bang·a manianirang baksa indakgipa a·selrangko manianio chagrongenga indiba iano darang manderangna jedakgipa a·sel golmalrangko on·angja uamang ka·donganiko on·angaha.
Bilsi anti manibaenga gita 2023 bilsini April jani 7 tariko bon·kamgipa maniani salo re·jomaniko dakangna permission on·ako uamang man·soangahachim indiba uamang bilongen tangka paisani gita gimana kenchake aro uamangni torom olakiani dakbewalko ong·atan baksana an·chingni community-o dal·a golmalrangko ong·katatnaba donga ine bon·kamo DC office-oni tanggitik ge·etaniko ra·galpilangaha, jekon bilsi 50-na bate dak·baengahachim.
“Chinga ia a·dok baksa namen bak man·pagiparang ong·a aro joltang manderangni neng·nikaniko mande ra·a jemangan chingna pangnan dakchakaniko on·a aro chinga ku·mong nangrimanio pangnan apsan dongangenga. Indakgipa kamrangna chingni gisikko saknaaniko on·angaha,” ine ua agandapangaha.
