TURA: Garo Hills-o Cashew game cha·enggipa manderangni namgnina Artificial Intelligence (AI)-o pangchake tarigipa mobile application-o A·chikkuchiba nanga pilakkon segataha ine kobor on·aha.
Ia mobile app-ko Karnataka a·dokni Puttur-o donggipa Indian Council of Agricultural Research (ICAR) Directorate of Cashew Research-ni gita tariahachim aro ia app-o cashew-ko jo·ong, sabisi aro uandakgipa neng·nikanirangoniko chel·chakna tariahachim.
“Meghalaya a·dokni manderang aro mongsongbate Garo Hills-o cashew game cha·enggipa manderang altubate ma·sina man·na gita ia app-o A·chikkuchiba Umiam-o donggipa ICAR Research Complex for NEH Region taridapahani gimin ian cashew game cha·enggiparangna bang·a dakchakani ong·gnok,” ine ICAR official-rang parakataha.
“Ia mobile app-ara game ge·e cha·giparangna ru·uta bilsirangna dakchakaniko on·gen aro ia app-chin rokom sotdok cashew jo·ong, ming kolgrik sabisi aro ming chikkung cashew bolni cha·ani chu·onggija sabisirangko on·sogimin noksaoniko ma·sina gita man·gen. Ia app-o AI aro computer-o pangchake dingtangmanchagipa changa sapaniko jakkalaha. Chu·ongnikgijako man·ode expert-rangko contact aro noksarangko bisongna on·atna gita man·gen aro sabisi rangko man·a skang ge·e game cha·giparangna ma·siatna man·a. A·songni dingtang dingtang dakna nangani aro nanggipa bosturangko chalaina ia app-ko kuliaha,” ineba ICAR-ni official-rang parakataha.