TURA: Central Reserve Police Force (CRPF) Valour Day-ko re·anggipa April-ni 9 tariko 120 Battalion CRPF-ni gita Tura-ni District Auditorium-o maniangaha aro ia salko manianio 120 Bn CRPF-ni Commandant Pramod Kumar Singh, mongsonggipa sokgipa ong·e bakko ra·angaha.
Ia CRPF Valour Day-ko manianio 120 Bn CRPF-ni Commandant, jinmana aganprakengon, ia salni gamchatgipa ong·ani bidingo talataniko on·angenba, a·songna dangdike on·anio pangnan ka·donggiparang ong·china sipairangko didiangaha.
Ia CRPF Valour Day-ko maniani bidingo talate on·angskaengon, 1965 bilsini April 9 tarik pring 3:30 bajimango, Gujarat a·dokni Kutch-o donggipa ‘Sardar’ aro ‘Tok’ post-rangko Pakistan a·songni dolsa sipairang chadrapeahachim indiba Pakistan a·songni sipairangko CRPF-ni dolgni sipairang, ka·dongbee warachaksoenba, Pakistan a·songni sipairangko katatpilna man·aha ine 120 Bn CRPF-ni Commandant, talataniko on·angenba, ia dakgrikanio Pakistan a·songni sak 34 sipairang so·otako man·aha aro sak 4-ko rim·e donna man·ahani gimin ia salko gisik ra·na gitasa ia CRPF Valour Day-ko manirongenga ine parakataha.
Ja·mano ua dingtangmancha President Police Medal aro Police Medal-na seokako man·gimin CRPF sipairangni bimingrangkoba parakatjolaha.
Ia CRPF Valour Day-ko maniani bak gita dingtangmancha attamni bako cultural program-koba ong·atangaha aro ia program-ko ong·atanio West Garo Hills a·jani Deputy Commissioner Jagdish Chelani, DIG Western Range aro dingtang dingtang official-rangba bakko ra·angtokaha.
