SHILLONG: Dingtang dingtang neng·nikanirang dongkuengani a·sel Hynniewtrep National Liberation Council (HNLC) bobil dol baksa agangrikaniko a·bachengna man·kujaenga ine sorkari baksa agangrikna HNLC-ni songako man·gipa Sadon K Blah parakataha.
“Bilsi 40-mangna HNLC bobil dol, tom·tomaona re·bapilna krengahani gimin ia agangrikaniko sikkele dakna man·jawa. Dingtang dingtang neng·nikanirang dongani giminsa ia agangrikaniko a·bachengna man·chipkujaenga,” ine Blah, kobor ra·timgiparangna aganaha.
Ia agangrikanio Home Affairs Ministry-ba bak ong·paengani gimin ia neng·nikaniko HNLC aro a·dok sorkarimangmangchide namatna man·jawa ineba ua aganaha.
Sadon Blah-ni parakatani gitade, bobil dol baksa agangrikani mitam kamrangko HNLC aro a·dok sorkaride chu·ongnikaiahachim indiba ma·mong sorkarisa somoi ra·dapkuenga.
Tom·tomanina agangrikaniko a·bachengatahaon, sorkari baksa agangrikani kamrangko mikkango donanggnok ineba HNLC-ni ku·baltitimgipa parakataha.
HNLC bobil dol baksa agangrikaniko ma·mong aro a·dok sorkari dolgnian a·bachengatna nangniktokengahachim ineba ua aganaha.
Tom·tomanina agangrikanio HNLC-ni commander-in-chief Bobby Marwein-ba bak ong·paengama ine sing·anina aganchakaniko on·angskaengon, tom·tomanina agangrikanio HNLC-ni dilgiparangan bak ong·jagenchimode agangrikaniko a·bachengatna man·jawa ine Blah parakataha.
HNLC membor-rangni bangki dongenggipa case-rangni gimin janapatengon, sorkari baksa agangrikaniko a·bachengatani ja·man uamangni bangki dongenggipa case-rangni giminba agangrikna man·gen ine Blah parakataha.
HNLC-ni gitcham general secretary Cheristerfield Thangkhiew-de sorkarini on·gipa rehabilitation package-ko man·jahani gimin sing·on, sianggipa Thangkhiew-de tom·tomaniona re·bapilna ja·ku de·anio bak ra·pajaha aro ua an·tangde HNLC-oni neng·takgipasa ong·e an·tangkoba bame on·chipjahachim ine Blah aganaha.
“Ua an·tangko bame on·chipangjahani gimin sorkarini on·gipa rehabilitation package-ko a·kangna man·jaha,” ine ua aganaha.