SHILLONG: Meghalaya a·doko COVID-19 giprorotaianiona a·dok sorkari namen tarisoaha ine a·dokni Health official saksa parakataha.
Health official-ni parakatani gitade, Budbar salo sakbonga manderangni COVID-19 man·aniko kobor man·soaha indiba uamangoni darangkoba hospital-o admit ka·jahachim.
Mikkang salrango bang·bata manderang COVID-19-ko man·angkunaba gnang ineba ua an·tangni jajrengchakenganiko parakataha.
Health official-ni parakatani gitade, COVID man·gipa manderangko done sanna bananiko on·na gita hospital-rango donggipa Covid ward-rangko kulipiltaina nanggnok aro iana dingtangmancha isolation centre-rangkoba kulidapaha.
COVID man·gipa manderangko sorkari nirikkienga ine talataniko on·angengon, “Ganesh Das Hospital sambao chinga ge 100 palang donggipa isolation centre-ko donaha aro Tura-oba apsan dakgipa biapko donaha,” ine official parakataha.
Dingtang dingtang sabisi donggipa manderangko simsakna nangani gimin aro budepa butchumarangko simsakna nangengani giminba ua janapataha.
COVID-19-ko warachakna gita manderangna niamrangko ra·gate on·na skangba a·dok sorkari, obostarangko nipilchenggen ineba health official parakataha.
Da·o dipet manderang inditanade porikka ra·egiparang dongkujaenga ine janapatengon, COVID-19-ni chin donggijagipa manderangkode da·o porikka ra·kujaenga ine Health official parakataha.