TURA: Reservation Policy-ni roster system-ko ra·gatani bidingo Meghalaya a·dok gimikon da·ororo jera ra·grikanirangko nikna man·engon, ia roster system-ni bidingo aro Tura-ko Winter Capital songchina dabienggipani bidingo chatro chatrirangna agan-talate on·na gita Bristibar salo, A·chik Conscious Holistically Integrated Krima (ACHIK) dolni gita dingtangmancha tom·bimonganiko Baghmara-o ong·atangaha aro ia tom·bimonganio chatro chatrirang, NGO-rang aro jolo songdongenggipa bang·a manderangan bakko ra·angtokaha.
Ia tom·bimonganio ACHIK dolni vice president, jinmana aro mongsongbate chatro chatrirangna aganprakangengon, Job Reservation Policy-ko ra·gatchengaonin roster system-ko donchina dabianio aro Tura-ko Second ba Winter Capital songchina dabianio A·chik jat gimikkon bakrimchina gita didiangaha.
A·chikrangni bil aro man·gnirangko batanggimin bilsi 50-ni gisepo ra·seke ra·aha ine janapatengon, ia man·gnirangko da·o A·chikrang man·pilchina gitasa 1972 bilsio reservation policy-ko ra·gatchengaonin da·o roster system-koba nangchakatna nangenga ine ACHIK-ni vice president parakataha.
Tura-ko Second ba Winter Capital songchina dabienggipani bidingo janapatskaengon, Meghalaya a·dokna dabidilanggipa pagitchamrangni gisepon Tura-ko Winter Capital songna songgigrikani dongani gimin ian A·chikrangni man·na nangenggipa bilan ong·a ine ACHIK-ni vice president parakataha.
Roster system-ko 1972 bilsionin nangchakate ra·gatchina aro Tura-ko Winter Capital songchina dabianiko mikkangchi ACHIK dol, Baghmara-o songdongenggipa manderang baksa bilakbatatgen ineba ia tom·anio jinma tik ka·e donangaha.
Roster System aro Tura-ko Winter Capital songchina dabiani bidingo tom·e chanchirima
Date:
Share post:
