AMPATI: A·songni gipin biaprango gitan South West Garo Hills a·jaoba National Fire Service Day-ko Sukrobar salo, South West Garo Hills a·jani police-rang, Ampati-o donggipa Fire & Emergency Service compound-o maniangaha.
Ia salko manianio South West Garo Hills a·jani Additional Superintendent of Police (ASP) TD Sangma, Deputy Superintendent of Police (DSP) Ravi Sangma, Probationary IPS Officer Naman Kumar aro dingtang dingtang police officer-rangba bakko ra·angtokaha.
Ia tom·anio SWGH a·jani ASP TD Sangma, jinmana aganprakengon, ia salko maniani bidingo talate on·angenba, kamtangtangko ka·anio janggirangko gimaatna nanggipa sipairangna mande ra·pilskaaniko dakangaha.
Ia tom·anio DSP Ravi Sangma-ba jinmana aganprakengon, manderangni janggirangko jokatna gita an·tangtangni janggirangko on·kanggipa a·song gimikni fire fighter ba wa·alko dakgrikgipa sipairangni biminrangko jinmana poraiataha.
Sianggipa sipairangnaba ia salko manianio dingtangmancha South West Garo Hills a·jani police-rang, pul bibalrangko done mande ra·pilskaaniko dakangaha.
Ia National Fire Service Day-ko maniani bak gita dingtangmancha flag sualaniko aro poster campaign-koba ong·atangaha aro re·baenggipa April 20 tarikona kingking skulo poraienggipa chatro chatrirang, dingtang dingtang program-rangkoba ong·atanggen ine u·iataha.
