Bilsi 6-ni ja·manba Tura-Dalu ramako tariani 55%-san matchotkuengpiti

TURA: Tura-oni Dalu-ona dakanggipa NH-51 ramako tariani da·o bilsidok ong·pilengahaoba kamrang 55 percent-ni gitasan matchotengkua ine kobor on·aha.
Ia ramara NHIDCL-ni jako ra·e tarienggipa rama ong·achim aro ia ramako 2018 bilsionin tarina a·bachengatahachim ine nikna man·a.
Tura-oni Dalu-ona dakanggipa ramani bakroani km 50-mangni gitasan ong·aiachim indiba ia ramako tariani matchotkujaengani a·selan gari gorango re·ruraenggipa manderang komibeoba kontagnikode nangenga.
Kobor on·timgiparangni u·iatani gitade, skanggipa ia project-ko Assam-ni contractor Manoranjan Brahma-na on·ahachim indiba ia company-ni kamrang namen ka·sinani gimin uamangni kosako dingtang dingtang dolrang matnangna a·bachengtokaha.
Ia company-na Tura-Dalu rama baksana Tura-oni Rongram-ona dakanggipa km 10-11-ni ramakoba on·ahachim.
Kamrang ka·sinani gimin ia company a·bachengode, COVID-19 sajinmako pa·sike aganahachim indiba sajinmarang bon·angani ja·manba uamangni kamrang ka·sinaniko pilakan nikna man·skaaha.
Ia kamko jako ra·chenggipa contractor, kamtangko ka·angkuna man·jae watgalani ja·man, re·anggipa bilsionide ARSS company, ia kamko jako ra·skaahachim.
Ia ramao da·o kam ka·anirangko nikna man·engahaoba kamrangko matchotningjaengani gimin bang·a manderangan aro mongsongbate ia rama jolrango songdongenggipa manderang suk ong·gijaniko paraktokaha.
Kamrangko matchotkujaengani gimin sing·sandiaton, kamrangko ta·raken matchotatna krengengachim indiba mitam biaprango ramarang naptomna a·bachengahani a·sel neng·nikanirangko man·na nangengaha ine ARSS-ni official saksa parakataha.
Jasarang kamko name ka·angkuna man·ode dingtanganirangko nikna man·gnok ineba ua parakataha.
Ia official-ni parakatani gitade, ia ramani badiaba badiaba bakrango manderang an·tangtangni a·arangna sorkarioniko compensation-rangko man·kujaengani gimin kachario badi ka·tokaha aro uandaken mitam bakrangode a·a ra·ani kamrangkoba matchotkujaenga.
Mitam biaprangode a·a nokgiparang compensation-rangko man·ahaoba biaprangko wate on·skakujaengani a·sel kamrangko a·bachengna man·kujaenga ineba ARSS-ni official parakataha.
“Indake ong·genchimoba chinga raken kamko ka·enga aro je biaprango kamrangko ka·na man·enga, uandakgipa biaprangode kamrang matchotangengaha,” ine ua aganaha.