SHILLONG: G20 Summit-ni ning·o Space Economy Leaders Meet (SELM)-ni precursor Meeting-ko da·al Sombar saloni a·bachenge salgnina Shillong-o sokachakenga aro ia tom·bimonganiko ong·atna gita sorkari pilak kamrangkon matchotmanaha.
Sombar saloni a·bachenge G20 tom·aniko ong·atengani gimin Shillong songjinmani dingtang dingtang biaprango, ia tom·ani bidingo seanirangko kadee dontokaha aro Police Bazar-o police dolrangko bilakbate donataha.
Ia tom·bimonganiko Hotel Courtyard by Mariott-o sokachakengani gimin, ia hotel-ona dakanggipa rama gita gari gorarangni re·ruraaniko champengatchengaha aro ia hotel-ni ramarang aro samba jolo donggipa biaprangkoba rongtal an·talatsotokaha.
Ia tom·bimonganiona dingtang dingtang G20 a·songrangoni dilgiparang sokbaengani gimin traffic-ni niamrangkoba adita taridapaha. Oakland-oni Polo-ona dakanggipa ramako one-way dakataha aro Oakland-chipakni Polo-ona re·angenggipa garirangkosan re·angna on·skaengachim indiba Robibar salo, ia tom·anio bakko ra·na sokbagipa delegate-rangni garikode Polo-chipakniba re·bana on·skaaiaha.
Iani bidingo bang·a manderangan, VIP-rangnade je niamkoba taridapna man·aiama ine sorkari aro police-rangko sing·doatskaaha.
Ia rama gita re·ruraenggipa garirangko ru·uta somoirangna dontongate dongani ja·man VIP-rang salpaksachibarasa sokbaahani giminba bang·a manderangan suk ong·gijaniko parakattokaha.