Manderangna dangdike on·na skani dongchina CM, civil service officer-rangko didia

SHILLONG: Manderangna dangdike on·anian sorkari officer-rangni mongsonggipa daito ong·a ine Sukrobar salo, Meghalaya a·dokni Chief Minister Conrad K Sangma parakatenba, manderangna dangdike on·na skani gisikko pangnan donchina gita civil service officer-rangko didiangaha.
“Na·simangni manderangna dangdike on·ani miksonganiko maming dakeba bil, tangka ba uandakgipa a·sakni gamrangchi amna on·nabe, unon na·simangni kamrang maming dakeba re·sretjawa aro unosa an·ching an·chingni miksonganirangko chu·sokatna man·gen,” ine Sangma aganaha.
Sukrobar salo, chang 16-gipa National Civil Services Day-ko Shillong songjinmani Pinewood Hotel-o manianio a·dokni Chief Minister, ia kattarangko aganaha. Ia tom·anio a·dokni Chief Minister baksana, a·dokni Chief Secretary DP Wahlang, Additional Chief Secretary Dr Shakil Ahammad, kamoni neng·takgimin IAS officer Anil Swarup aro gipinrangba dongpae bakko ra·angtokaha.
Civil service officer-rangko ku·cholsan ong·e kamko ka·china gitaba ia tom·anio Chief Minister ku·pattiangaha.
“An·ching apsan dolo ong·engon, kamtangtangko chu·sokatanio ga·akjana gita saksa sakgipinko mande ra·grikna aro pangchakgrikna nanga,” ineba ua aganaha.
A·dokko chalaianio mikkangchi bang·en dingtanganirang donggen ine janapatengon, “Mongsonggipa namdapatanirangoni mingsade Village Volunteer-rangko donna miksonganian ong·enga aro ia volunteer-an ua songo sorkarini pal kam ka·gipa ong·gen. Uni gimin ua songo mai ong·enga aro mai ong·jaenga uani bidingo ma·sie ra·na gita ia volunteer-an sorkarina u·iattimskagipa ong·gen aro an·ching sak 6500-mangni gita village volunteer-rang donggen,” ine Chief Minister aganaha.
Ia village volunteer-rangni gimin talataniko on·angkuengon, songo noko tanggitik a·sel ong·anirang, jekai chi banani, a·a rurongani, bijoli siani, chi man·gijani, transformer-rang bretani somoio, chi pipe-rang bretani somoio ba uandakgipa obosta ong·ani somoirangoba ia volunteer-rangan sorkarina u·iatskana man·gen ine Sangma parakataha.
Chief Minister-ni aganani gitade, ia volunteer-rangan, songo noko self help group (SHG)-rang baksa nangrime, songni nokni nanga kamrangkoba dakchake on·na man·gen.
Gram sevak-rangko mangrakbatatna nangengani gimin aganangengon, gram sevak-rangni kam ka·ani bewalrangko namdapatna gita cholrangko nichina Chief Minister didiangaha.