BAGHMARA: South Garo Hills a·jani Rongdik aro Rongreng chibimarangoniko an·cheng aro rong·srek bikote ra·engani a·sel chiring chibisikrangna nangchakeaniko ra·baengani gimin mikrakatanirangko on·angani ja·manoba da·o South Garo Hills a·jani Karukol-Emangre samba jolo donggipa Rongdik chibimaoniko National Highway (NH)-62 ramako tarienggipa company-rangoni dolsa Nidhi Constructions, da·oba an·cheng aro rong·srengrangko bikotengkua ine kobor on·aha.
Koborko on·ani gitade, Forest department-ni show cause notice-ko man·soani ja·man ia Nidhi Construction, Rongreng chibimaonikode an·cheng aro rong·srek bikotaniko dontongahachim indiba da·o apsan kamnan uamang Rongdik chibimaoniko bikotskaengahachim.
Jolo songdongenggipa manderangni parakatani gitade, ia company-rang, batanggimin bilsignimangonin ia chibimarangoniko an·cheng aro rong·srekrangko bikotengani a·sel da·o ia chibimani obostarang namjabatrorona a·bachengengaha.
Ia kosako janapgimin company-rangara, Baghmara-Ranikor ramako tarina contract ra·gipa company-rang ong·achim aro uamang batanggimin bilsignimangonin ia ramako tariengahachim.
Iani bidingo South Garo Hills a·jani Deputy Commissioner Shashank Awasthi-na u·iaton, iako sandirokchina gita ua DFO, PWD aro Rongara-ni BDO-na pakwate on·angaha aro ia official-rang gimikan ia biaprangko nieaha.
Jolo songdongenggipa manderangni u·iatani gitade, da·o gital cho·enggipa biapara Karukol song samba jolo donggipa Rongdik chibima rikamo ong·achim. Rongara samba jolo ia apsan chibimaonikon NSC company-ba an·cheng aro rong·srekrangko bikotahachim ine kobor on·aha.
“National Highway-ko tarigipa company ong·e uamang samtangtangna dongimin niamrangko talen ma·siachim indide maikai uamang niamrangko pe·e kamrangko ka·enga? Karukol-ode uamang biap damgnio an·cheng aro rong·srekrangko bikotaha indiba uamang Nokmani permission-kon ra·jaha,” ine songni manderang parakataha.
