SHILLONG: Pringantian chi ko·na bucketko de·e line ka·e chadenge sengna nangengani gimin aro salantion china neng·nikaniko chagronganina Shillong songjinma aro sepangjolgipa jolrangni manderangni salantini ong·rongbewal gita ong·piljok.
Shillong songjinmani Laban joloba chiko man·a neng·nikaniko nikna man·ronga.
Manderang salanti pringanti bucket sa chiko man·amang ru·ute sengna nanga, salo bucket sa chi ringna man·rikoba namaigen ine chanchie manderang salgipina nichake donga. Indaka somoio chi palgipa water tanker-rangna namgni ong·skaa indiba da·ororode chini damba barijok.
“Shillong songjinmao china neng·nikako chagrongani gimin anga u·ia, uni gimin ia mamlao chanchirimna official-rangko okamaha, ine PHE Minister Marchuise Marak aganaha.
‘Department aro official-rang, chiko man·a neng·nikani bidingo kam ka·enga. Minggipin da·ororo global warming-ni gimin an·ching u·itoka, iaba mingsa chi komiangani a·sel ong·a, jeni a·sel supply system-o nangchakenga, ine PHE Minister aganaha.
Ia mamlao nipilanga ja·man, maidakgipa ja·kuko de·ao namgen iani gimin chanchianggen. Iarangna agreba a·doko salgittamoni water supply dongjaenga, Greater Shillong Water Supply Scheme (GSWSS) nosto ong·ani gimin March jaoni chiko man·anio neng·nikenga ine PHE Minister talataha.
March 29,30 aro 31 tariko Shillong songjinmao GSWS dongsrangja, power supply-o neng·nikani gimin pumping operation-o nangchakaha.
April 12 tarikoba, GSWSS-ni gravity-o nosto ong·ani gimin water supply-o neng·nikako chagrongaha.
Indake ong·engon PHE Minister, ‘GSWSS Phase III-o adita neng·nikarangko man·enga ine u·iataha.
Department batanggimin bilsi 2022 December jao GSWSS Phase III-ko songna nisanko donahachim. Bilsi 2008 October 22 tariko Mawphlang -o gitcham president Pratibha Patil, pangchakaniko songe on·angaha.
