SHILLONG: Umiam-Jorabat Expressway aro Shillong Bypass, dilgnian a·dokni mongsonggipa aro jakchakbatgijagipa national highway ong·a, ia ramao bang·en a·sel ong·arangkoba nikna man·enga. Indake ong·engon NHAI, ia ramao a·sel ong·anio ba ramako tarianio engineering-ni gita maming gualani dongja ine janapate, manderangko ramao simsake gari salchina mol·molataha.
Batanggimin February jao, Bongaigaon diocese-oni saksa kamal aro sakgittam nun-rangko man·gope sakdok manderang gari a·sel ong·ao siaha. Uan Sumer jolo truck garichi su·gaka man·e sitokaha. Mijaomangmangsan to gari salgipa tangker a·sel ong·e kamgopaha. To salgipa gari ramao pangpile, Maruti gariko su·gakaha jeni a·sel bolgni garian wa·al kamgopaha.
Robibar atamoba truk bolsa Umsning Bypass-o pangpilaha, jeni a·sel truk gari salgipa aro truk gario dongpagipa jokkom ong·aha.
Maini a·sel truk gari pangpilaha iani gimin talkujaenga, trukni tank gopretaha aro engine oil ba to highway-o ga·aktokaha, jeni a·sel bike schooty dakgipa two wheeler-rang bang·an skid ong·tokaha.
Indake ong·engon ramao a·sel ong·anirangko nikna man·rongengani gimin sing·on NHAI-ni official, rama tarianio engineering -ni gita gualani dongja ine aganaha.
NHAI, a·sel ong·ani ja·man mamlako sandiaha, February jao ong·gipa obostakoba sandiaha indiba authority-ni gita maming gualani dongja ine official talataha.
Minggipin ramao gari salon mande simsakna nanga ineba NHAI agan-ku·pattiaha.
Uandake ramako naljokgipa ong·atna District Road Safety Committee, DC-ni dilanio aro PWD official-rang, police, NHAI-ni official-rang gronge agangrikronga.
